Ciahniki ź Minska stali spyniacca ŭ Maskvie na novym vakzale

Ciahniki ź Minska ŭ Maskvu ciapier buduć spyniacca na novym čyhunačnym vakzale «Maskva-Sici». Raniej paviedamlałasia, što biełaruskija ciahniki nie buduć tam spyniacca, pakolki vakzał pryznačaŭsia pieravažna dla haradskich i pryharadnych elektryčak, ale ciapier rašeńnie pamianiali, piša Blizko.by.

Fota: Blizko.by

Da hetaha ciahniki ź Minska spynialisia ŭ Maskvie tolki na Biełaruskim vakzale, a pa darozie ŭ rasijskuju stalicu — na bujnych stancyjach u Smalensku, Safonavie i Viaźmie. Niekatoryja taksama spynialisia ŭ Haharynie i Mažajsku.

Novy vakzał «Maskva-Sici» raźmieščany na pieršaj linii Maskoŭskich centralnych dyjamietraŭ — MCD-1, jakaja złučaje Biełaruski i Saviołaŭski napramki Maskoŭskaj čyhunki. Jaho pabudavali na miescy staroj stancyi «Ciestaŭskaja». Vakzał źjaŭlajecca častkaj bujnoha transpartna-pierasadačnaha vuzła «Maskva-Sici», jaki abjadnoŭvaje niekalki linij mietro i pryharadnych ciahnikoŭ. Pavodle infarmacyi vydańnia, jon raźličany na absłuhoŭvańnie kala 100 tysiač pasažyraŭ u sutki.

Stancyja «Maskva-Sici» ŭžo źjaviłasia ŭ raskładzie jak minimum troch ciahnikoŭ ź Biełarusi — chutkasnych «Łastavak» № 718, 720 i 722.

Kamientary da artykuła