Bolš za 100 pradstaŭnikoŭ biełaruskaj dyjaspary ŭ Čechii sabralisia na kanfierencyju
Siońnia ŭ Prazie adbudziecca Kanfierencyja biełarusaŭ i biełarusak Čechii, na jakuju, pavodle arhkamiteta, zarehistravalisia ŭžo bolš za 100 čałaviek.
Kryścijana Šyjanok, fota Radyjo Svaboda
Kanfierencyja projdzie ŭ budynku mahistrata stalicy Čechii pad patranažam mera Prahi Bahusłava Svobady. Na dumku siabroŭki arhkamiteta, kiraŭnicy Ofisa demakratyčnych sił Biełarusi ŭ Čechii Kryściny Šyjanok, heta śviedčyć pra davier haradskich uład da biełarusaŭ.
Napiaredadni padziei Kryścina Šyjanok raskazała Radyjo Svaboda pra biełaruskuju supolnaść u Čechii i pra niekatoryja prablemy, jakija buduć abmiarkoŭvać na kanfierencyi.
«Čatyry hady tamu adbyŭsia I Źjezd biełarusaŭ i biełarusak Čechii, jaki tady mieŭ farmat schodu z mandatami dla hałasavańnia, u tym liku dla akreśleńnia peŭnych našych pazicyj, źviazanych z pačatkam poŭnamaštabnaj vajny Rasii suprać Ukrainy. Ciapierašniaja padzieja projdzie ŭ inšym farmacie. Chutčej heta budzie refleksija na tyja źmieny, što adbylisia z nami, a taksama abaznačeńnie i analiz novych vyklikaŭ, ź jakimi sutykajecca biełaruskaja supolnaść u Čechii siońnia», — zaznačyła Kryścina Šyjanok.
Biełarusaŭ u Čechii paboleła, choć prytok novych mihrantaŭ ź Biełarusi apošnimi hadami davoli nievialiki, što źviazana ź vizavymi abmiežavańniami, jakija Čechija ŭviała ŭ 2022 hodzie. Kolkaść novych biełaruskich palityčnych uciekačoŭ u Čechii vymiarajecca nie sotniami, a dziasiatkami na hod. Raniej stabilna prybyvali biełarusy, jakija pryjazdžali pracavać, vučycca ci ŭźjadnacca ź siamiejnikami.
Pavodle aficyjnych źviestak, na jakija spasyłajecca Kryścina Šyjanok, u Čechii ŭ 2021 hodzie było bolš za 8200 biełarusaŭ z pastajannymi i časovymi dazvołami na žycharstva, ciapier takich krychu bolš za 7000. Ale častka biełarusaŭ za hetyja hady paśpieła pryniać češskaje hramadzianstva.