«Jeŭropie važna zastavacca paśladoŭnaj». Cichanoŭskaja i Barel abmierkavali supraciŭ biełarusaŭ na mižnarodnym forumie ŭ Ispanii
Demakratyčnaja lidarka Biełarusi ŭziała ŭdzieł u dyjałohu «Biełaruś: cichi supraciŭ» u miežach mižnarodnaha Forumu Ła-Tocha ŭ Ispanii
Fota: pres-słužba Śviatłany Cichanoŭskaj
Razam z byłym vysokim pradstaŭnikom ES pa zamiežnych spravach i palitycy biaśpieki Žazepam Barelem jany abmierkavali situacyju ŭ Biełarusi, demakratyčny ruch i supraciŭ biełarusaŭ režymu, paviedamlaje jaje pres-słužba.
Padčas razmovy Śviatłana Cichanoŭskaja taksama padziakavała ES i ZŠA za padtrymku biełaruskich niezaležnych miedyja, pravaabarončych arhanizacyj, NDA, kulturnickich i histaryčnych inicyjatyŭ, jakija paśla 2020 hoda byli vymušanyja pieranieści svaju pracu za miežy krainy. Jana adznačyła, što hetaja padtrymka dazvoliła biełaruskaj hramadzianskaj supolnaści zachavać svaje struktury i praciahnuć pracu ŭ vyhnańni.
Asobna Śviatłana Cichanoŭskaja źviarnuła ŭvahu na nieabchodnaść paśladoŭnaj palityki ES u dačynieńni da dyktatur: «Moža ŭźniknuć spakusa viarnucca da raniejšaha stanu rečaŭ — źmirycca z dyktaturaj, z Łukašenkam, z Rasijaj. Ale Jeŭropa hruntujecca na kaštoŭnaściach i pryncypach, jakija jana zaŭsiody abaraniała. Kali ad ich admovicca, Rasija budzie vykarystoŭvać heta jak słabaść. Tamu Jeŭropie važna zastavacca paśladoŭnaj».
Dla Forumu Ła-Tocha tema supracivu demakratyi taksama maje admysłovaje značeńnie. U 2022 hodzie hałoŭnuju premiju forumu atrymaŭ ukrainski narod — za abaronu demakratyi i supraciŭ rasijskaj ahresii. U 2024 hodzie premiju atrymaŭ i sam Žazep Barel, dyjałoh ź jakim staŭ adnoj z apošnich mižnarodnych siesij sioletniaha forumu.