Na rasijskich siłavikoŭ u kanvojnym vahonie na Kaŭkazie napaŭ narkahandlar, jakomu pahražała pažyćciovaje źniavoleńnie. Jaho zabili

Fiederalnaja słužba vykanańnia pakarańniaŭ (FSVP) Rasii abvierhła paviedamleńni pra bunt u ciahniku ź źniavolenymi, jaki ruchaŭsia pa Paŭnočna-Kaŭkazskaj čyhuncy. Jak śćviardžaje słužba, na stancyi Murtazava ŭ Kabardzina-Bałkaryi adbyŭsia nie bunt, a napad adnaho z asudžanych na supracoŭnika kanvoju. Źniavoleny padčas vyvadu ŭ tualet napaŭ na kanvaira i zavałodaŭ jaho tabielnaj zbrojaj.

Dźmitryj Puškaroŭ (z čornaj baradoj) padčas ekstradycyi z Hruzii. Skrynšot ź videa

U vyniku napadu adzin supracoŭnik FSVP zahinuŭ, jašče troje atrymali ranieńni. Inšyja supracoŭniki kanvoju, jakija prybyli na dapamohu, zastrelili napadnika. Siarod cyvilnych asob paciarpiełych nie było.

Paźniej vydańnie Baza paviedamiła, što napad na kanvoj ździejśniŭ 43‑hadovy Dźmitryj Puškaroŭ, jakoha rasijskija ŚMI nazyvajuć «mahadanskim Eskabaram». Raniej jaho ekstradavali z Hruzii ŭ Rasiju pa spravie ab šerahu złačynstvaŭ, źviazanych z narkotykami.

Pavodle «Bazy», Puškarovu pahražała pažyćciovaje źniavoleńnie, tamu jon i moh navažycca pasprabavać uciačy. Jašče ŭ 2023 hodzie jon, jak śćviardžajecca, nabyŭ bujnuju partyju narkotykaŭ i arhanizavaŭ jaje dastaŭku ŭ Mahadanskuju vobłaść dla dalejšaha zbytu.

Paźniej na adnoj ź miascovych małočnatavarnych fiermaŭ, pavodle materyjałaŭ kryminalnaj spravy, vyroščvalisia raśliny, jakija ŭtrymlivajuć narkatyčnyja rečyvy. Uradžaj zachoŭvaŭsia ŭ padsobnym pamiaškańni, jakoje kantralavaŭ Puškaroŭ. Akramia taho, jon, jak śćviardžajecca, kiravaŭ internet-kramaj pa prodažy narkotykaŭ. U studzieni 2024 hoda praz schovanku jon pieradaŭ adnamu z saŭdzielnikaŭ bolš za 1,3 kiłahrama narkatyčnych rečyvaŭ.

Paśla hetaha Puškarovym zacikavilisia siłavyja struktury. Nieŭzabavie jon razam ź inšymi fihurantami spravy vyjechaŭ za miažu. Jaho abviaścili ŭ mižnarodny vyšuk i zatrymali ŭ Hruzii. 24 vieraśnia Puškarova razam ź jaho saŭdzielnikam Karniejem Fiedunovym ekstradavali ŭ Rasiju.

Puškarovu vystavili abvinavačańni ŭ stvareńni i ŭdziele ŭ złačynnaj supolnaści, sprobie zbytu narkotykaŭ u asabliva bujnym i bujnym pamierach, niezakonnym nabyćci, zachoŭvańni i pieravozcy prekursaraŭ, a taksama niezakonnym vyroščvańni narkatyčnych raślin u bujnym pamiery. Akramia taho, jamu stavili ŭ vinu dadatkovyja epizody, źviazanyja ź niezakonnym abaračeńniem prekursaraŭ i sprobaj zbytu narkotykaŭ u asabliva bujnym pamiery.

3 kastryčnika FSVP paviedamiła, što siamji zahinułaha supracoŭnika i paciarpiełym budzie akazanaja nieabchodnaja dapamoha. Supracoŭniki UFSVP pa Staŭrapolskim krai, jakija praduchilili ŭcioki z-pad varty, buduć pradstaŭlenyja da dziaržaŭnych uznaharod Rasii. Adna z uznaharod budzie prysudžanaja paśmiarotna.

Kamientary da artykuła