Estonija pieradysłakavała vajskoŭcaŭ bližej da miažy z Rasijaj
U Estonii taksama aścierahajucca, što Kreml moža pajści na avanturu, skarystaŭšysia zručnym momantam.
Fota: Sergei Grits / AP
Estonija na pastajannaj asnovie pierakidvaje svaje vojski bližej da miažy z Rasijaj i zakuplaje ŭzbrajeńnie, zdolnaje nanosić udary ŭhłyb terytoryi susiedniaj dziaržavy, paviedamlaje Bi-bi-si sa spasyłkaj na Financial Times.
Kiraŭnictva ŭzbrojenych sił i raźviedki Estonii nie ličyć, što Maskva imkniecca da poŭnamaštabnaj vajny z NATA — prynamsi, u bližejšyja dva hady, padkreślivaje vydańnie. «Adnak jano ličyć, što vajaŭničy susied rychtujecca da mahčymaha kanfliktu z hetaj nievialikaj dziaržavaj Bałtyi ŭ budučyni», — havorycca ŭ artykule.
U Estonii taksama aścierahajucca, što Kreml «moža pajści na avanturu, skarystaŭšysia zručnym momantam — naprykład, raspačać uvarvańnie abmiežavanaha maštabu, kab pravieryć na tryvałaść pazicyju NATA ab kalektyŭnaj abaronie», śćviardžaje hazieta.
Pavodle jaje danych, estonskija vajskoŭcy i raźviedčyki pryznajuć, što ni sama Estonija, ni NATA na dadzieny momant nie zabiaśpiečvajuć nadziejnaha strymlivańnia pry takim scenary. Heta padšturchnuła krainu pierajści da stratehii «aktyŭnaj abarony».
«My pavinny pačynać ź miažy i pieramahać užo ŭ pieršych bajach», — zajaviŭ pałkoŭnik Tarma Kundła, kamandzir 1‑j bryhady Sił abarony Estonii, asnoŭnaha bajavoha padraździaleńnia krainy.
U ramkach novaj stratehii jaho bryhada budzie na pastajannaj asnovie pieradysłakavanaja z Tapa ŭ Jychvi — horad za 50 km ad rasijskaj miažy.
«Strymlivańnie nie pracuje, — zajaviŭ vydańniu vysokapastaŭleny pradstaŭnik vajennaj raźviedki Estonii. — Dla ŭsich nas u krainach Bałtyi krytyčna važnym pieryjadam dla vyrašeńnia hetaj prablemy buduć bližejšyja adzin-čatyry hady».
U mai ŭrad Estonii ŭnios termin «aktyŭnaja abarona» ŭ kancepcyju nacyjanalnaj biaśpieki krainy. «Z taho času nievialikija, ale vysokaprafiesijnyja ŭzbrojenyja siły krainy pačali ŭtojlivuju, adnak radykalnuju pierahrupoŭku, — piša Financial Times. — Elitnyja padraździaleńni z hałoŭnaj vajennaj bazy Estonii ŭ Tapa ciapier na pastajannaj asnovie pieravodziacca na pazicyi, raźmieščanyja na ŭschodzie».
Jak adznačaje hazieta, akramia novaj bazy ŭ Jychvi, u Narvie na miažy z Rasijaj budujecca abjekt, na jakim u vypadku kryzisnaj situacyi zmohuć raźmiaścicca da 1000 vajskoŭcaŭ.