U Rasii mahčymaja ŭspyška čumy. Navat Bieły dom sočyć za situacyjaj
Padstavaj stała śmierć 28‑hadovaj supracoŭnicy Irkuckaha supraćčumnaha instytuta. Jana raźbiła prabirku z uzbudžalnikam lohačnaj čumy.
Darja Šypiłava
Administracyja Donalda Trampa sočyć za situacyjaj vakoł mahčymaha vypadku lohačnaj čumy ŭ Irkuckaj vobłaści, piša Axios sa spasyłkaj na amierykanskaha čynoŭnika.
«Administracyja viedaje pra situacyju, sočyć za ŭspyškaj i aceńvaje mahčymyja varyjanty dziejańniaŭ», — skazaŭ surazmoŭca vydańnia.
Pavodle rasijskich miedyja, 25 vieraśnia 28‑hadovaja supracoŭnica Irkuckaha supraćčumnaha instytuta Darja Šypiłava raźbiła prabirku z uzbudžalnikam lohačnaj čumy. Praź niekalki dzion jaje špitalizavali ź ciažkaj pnieŭmanijaj, a ŭ noč na 2 kastryčnika jana pamierła.
Paśla hetaha ŭ niekalkich miedycynskich ustanovach uviali karancinnyja miery, a amal 200 čałaviek, jakija mahli kantaktavać z žančynaj, uziali pad nazirańnie. Pavodle hubiernatara Irkuckaj vobłaści Ihara Kobzieva, prykmiet zachvorvańnia ŭ ich niama, testy dali admoŭnyja vyniki.
Rasijskija orhany achovy zdaroŭja nie paćvierdzili, što Šypiłava chvareła na čumu. Rasspažyŭnahlad nazvaŭ pryčynaj jaje śmierci «pnieŭmaniju niavyśvietlenaj etyjałohii» i zajaviŭ, što analizy nie vyjavili mikraarhanizmaŭ, źviazanych ź jaje pracaj. Epidemijałahičnuju situacyju ŭ rehijonie viedamstva nazyvaje stabilnaj.