«Čakajem svaje kvatery ŭžo šosty hod». Dolščyki minskaha ŽK Smart zapisali videazvarot da Łukašenki
Budaŭnictva žyłoha kompleksu na vulicy Pryłuckaj pačałosia ŭ 2019 hodzie, ale ź siami siekcyj dahetul zdali tolki dźvie. Dolščyki śćviardžajuć, što prajekt za hety čas patańnieŭ, jakaść rabot vyklikaje pytańni, a ich znoŭ prymušajuć pahadžacca na pieranos terminaŭ.
Šmatpakutny žyły kompleks Smart na skryžavańni vulic Pryłuckaj i Hłaholeva pačali budavać jašče ŭ 2019 hodzie. Pieršapačatkova 13‑paviarchovy dom u formie trapiecyi abiacali ŭźvieści chutka, ale za pieršyja hady zabudoŭščyk uvioŭ u ekspłuatacyju tolki dźvie siekcyi, piša Onliner.
Terminy zdačy astatnich piaci padjezdaŭ pastajanna pieranosilisia: spačatku na 2022-hi, potym na 2023 hod. Niekatoryja dolščyki navat vyrašyli skasavać damovy i źviarnulisia ŭ sud, kab viarnuć svaje hrošy.
Tyja minčuki, jakija ŭsio ž vyrašyli dačakacca klučoŭ, u 2024 hodzie źviarnulisia pa dapamohu da Łukašenki. Dniami jany zapisali druhi videazvarot, u jakim havorycca:
— Alaksandr Ryhoravič, my, dolščyki šyroka viadomaha ŽK Smart, źviartalisia da Vas u 2024 hodzie. Paśla zvarotu da Vas situacyja rezka palepšyłasia, ale prajšło try hady, a dom nie zdadzieny. Nas praciahvajuć karmić abiacańniami i prymušajuć padpisvać dakumienty ź pieranosami. My čakajem svaje kvatery ŭžo šosty hod. Akramia terminaŭ, prajekt značna patańnieŭ, što vidać pa źmienie fasada i zamienie liftaŭ. A taksama źmienšyli kolkaść miescaŭ ahulnaha karystańnia za košt prodažu kładovak na hetych miescach. Dom nie zdadzieny, jakaść navidavoku. Prosim vas źviarnuć uvahu na našy prablemy.
Treba skazać, što zabudoŭščyk doma — kampanija «NikaPrajekt» — niadaŭna zajaviŭ, što maje namier skončyć budaŭnictva da kanca 2026 hoda. Ciapier jon rychtuje da zdačy treciuju, čaćviortuju i piatuju siekcyi, paralelna zaviaršajučy raboty ŭ apošnich — šostaj i siomaj.
Adnak pretenzii dolščykaŭ datyčacca nie tolki terminu zdačy abjekta. Pavodle ich słoŭ, jakaść budaŭnictva pakidaje žadać lepšaha. Heta značyć, što navat paśla pryjomki žylla im daviadziecca vyrašać užo novuju prablemu: davodzić da ładu doŭhačakanyja kvatery i miescy ahulnaha karystańnia.