Vynieśli prysud maci, jakaja zabiła novanarodžanaha syna
Va Ušačach maci pry rodach skinuła dzicia ŭ vyhrabnuju jamu prybiralni.
Žycharku Ušackaha rajonu pryznali vinavataj u zabojstvie ŭłasnaha dziciaci, piša «Minskaja praŭda». Trahiedyja adbyłasia ŭ sakaviku hetaha hoda. Pavodle śledstva, žančyna złoŭžyvała ałkaholem i ŭžo była pazbaŭlenaja baćkoŭskich pravoŭ u dačynieńni da starejšaj dački.
U stanie ałkaholnaha apjanieńnia žančyna naradziła žyćciazdolnaha chłopčyka ŭ prybiralni kala doma. Jana naŭmysna razarvała pupavinu, u vyniku niemaŭla ŭpała ŭ vyhrabnuju jamu, dzie zahinuła.
Ekśpiertyza vyjaviła ŭ arhaniźmie novanarodžanaha etyłavy śpirt. Žančyna schavała fakt naradžeńnia syna, nie sprabavała jaho vyratavać i naŭmysna nie źviarnułasia pa miedycynskuju dapamohu.
Sud prysudziŭ jaje da 15 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ahulnaha režymu.