Rasija i ZŠA viaduć pieramovy ab inviestary dla «Paŭnočnaha patoku»
Vysokapastaŭlenyja pradstaŭniki Rasii i ZŠA praviali pieramovy ab pryciahnieńni amierykanskaha inviestara da hazapravodaŭ «Paŭnočny patok». Pra heta paviedamiŭ Reuters sa spasyłkaj na krynicy.
U pieramovach udzielničali śpiecpradstaŭnik prezidenta Rasii pa inviestycyjna-ekanamičnym supracoŭnictvie z zamiežnymi krainami, kiraŭnik Rasijskaha fondu pramych inviestycyj Kirył Dźmitryjeŭ i ziać amierykanskaha lidara Džared Kušnier.
Dva surazmoŭcy Reuters zajavili, što niezrazumieła, u jakoj stupieni abmiarkoŭvałasia tema «Paŭnočnaha patoku». Pry hetym jany adznačyli, što jana zastajecca «na paradku dnia».
Ideja pryciahnieńnia amierykanskaha inviestara da «Paŭnočnych patokaŭ» užo ŭzdymałasia ŭ 2024 hodzie. Z takoj idejaj vystupaŭ Styvien Linč, jaki 20 hadoŭ zajmaŭsia biznesam u Rasii. Jon źviartaŭsia da ŭrada ZŠA z prośbaj vydać jamu licenziju na ŭdzieł u tarhach, kali hazapravod «Paŭnočny patok — 2» vystaviać na aŭkcyjon, pisała The Wall Street Journal.
Linč razhladaŭ hetuju ździełku jak «ryčah cisku na Rasiju» ŭ mirnych pieramovach. «Sutnaść u nastupnym: heta ŭnikalnaja mahčymaść dla Amieryki i Jeŭropy kantralavać enierhazabieśpiačeńnie Jeŭropy da kanca ery vykapniovaha paliva», — kazaŭ Linč.