Padletak adpraŭlaŭ paviedamleńni pra miniravańnie. Sud pazbaviŭ jaho telefona
Minsku adbyŭsia sud nad 15‑hadovym padletkam, navučencam kaledža. Chłopca abvinavacili ŭ zahadzia iłžyvych paviedamleńniach pra niebiaśpieku.
Pryčynaj takich dziejańniaŭ stała svarka sa znajomymi — padletak sprabavaŭ ich padstavić. Padrabiaznaści spravy raskazali «Minsk-naviny».
Vyśvietliłasia, što padčas prahułki chłopiec pasvaryŭsia z kampanijaj padletkaŭ, zataiŭ na ich kryŭdu i pačaŭ dumać, jak možna im adpomścić. Nastupnyja dva dni sa svajho telefona jon adpraŭlaŭ elektronnyja paviedamleńni pra toje, što ŭ minskaj škole i himnazii zakładziena vybuchoŭka. Praŭda, padpisvaŭsia ich imionami.
Adnak sapraŭdnaha parušalnika chutka vyličyli, suprać jaho raspačali kryminalnuju spravu. Svaju vinu padletak całkam pryznaŭ i raskajaŭsia.
— Abvinavačany navučajecca na pieršym kursie adnaho sa staličnych kaledžaŭ, raniej da kryminalnaj i administracyjnaj adkaznaści nie pryciahvaŭsia, charaktaryzujecca zdavalniajuča. Jaho baćki kampiensavali vydatki na pryciahnieńnie supracoŭnikaŭ milicyi i Śledčaha kamiteta dla vyjezdu i praviadzieńnia śledčych dziejańniaŭ pa iłžyvych paviedamleńniach pra rychtavanyja vybuchi, — prakamientavała staršy pamočnik prakurora Leninskaha rajona Valancina Chackievič.
— Sud pryznaŭ jaho vinavatym u ździajśnieńni złačynstvaŭ, praduhledžanych č. 1 i č. 2 art. 340 KK («Zahadzia iłžyvaje paviedamleńnie pra niebiaśpieku»), i pryznačyŭ kančatkovaje pakarańnie ŭ vyhladzie adnaho hoda abmiežavańnia voli biez nakiravańnia va ŭstanovu adkrytaha typu.
Taksama mabilny telefon abvinavačanaha byŭ kanfiskavany ŭ dachod dziaržavy.