«Albo harełaja, albo suchaja». Biełarusy krytykujuć bulbu fry ŭ «Mak.baj»

Bulba ŭ «Mak.baj», paśla taho jak admovilisia ad impartnaj, zavozicca z Tałačyna. Naviedvalniki restarana chutkaha charčavańnia narakajuć: ci to sort nie toj, ci to rabotniki jaje smažyć nie ŭmiejuć.

Tak vyhladaje bulba-fry ŭ Mak.by. Fota: threads.com

«My niejak budziem abmiarkoŭvać bulbu fry z Mak.by? Heta ž kašmar», — napisała adna z karystalnic Threads.

U kamientarach vyśvietliłasia, što da bulby fry ŭ biełaruskaj sietcy chutkaha charčavańnia ŭ naviedvalnikaŭ niamała pretenzij.

«Samomu kupić zamarožanuju i zakinuć u aerahryl atrymlivajecca lepš»

Častka kamientataraŭ pahadziłasia, što jakaść bulby pakidaje žadać lepšaha.

«Absalutny kašmar. Ź dziesiaci razoŭ daj boža, kab dva byli smačnyja. Astatnija — albo harełyja, albo suchija, albo adzin tłušč. Zadziaŭbali, budu ciapier zaŭsiody praviarać na kasie i rabić viartańnie», — aburajecca adna z naviedvalnic.

«Samomu kupić zamarožanuju i zakinuć u aerahryl atrymlivajecca lepš. Ale ja b nie skazaŭ, što prosta kašmar», — ličyć inšy ŭdzielnik dyskusii.

Niekatoryja skardziacca nie tolki na smak, ale i na tempieraturu stravy.

«Za apošnija razoŭ dvaccać, moža, adzin raz była realna haračaja, salonaja i smačnaja. Vykinutyja hrošy», — napisaŭ jašče adzin karystalnik.

Zrešty, jość i tyja, chto ličyć, što prablema nie stolki ŭ samoj bulbie, kolki ŭ tym, jak jaje hatujuć i padajuć.

«Bulba fry smačnaja. Ale niešta złamana ŭ pracesach — rehularna dajuć raźmiakčełuju i astyłuju. Prašu pierarabić, i zaŭsiody biez prablem robiać śviežuju», — padzialiŭsia dośviedam naviedvalnik.

«Z aryhinalnym «Makdonaldsam» roźnica kałasalnaja»

Asobnaja dyskusija razharnułasia vakoł paraŭnańnia biełaruskaha «Mak.baj» z «Makdonaldsam».

«Ja taksama dumała, što «bolš-mienš» i pryzvyčaiłasia da našaj, ale niadaŭna była ŭ aryhinalnym «Makdonaldsie». Roźnica kałasalnaja, naša bulba niby varanaja», — napisała aŭtarka dopisu.

Jaje padtrymała inšaja žančyna, jakaja niadaŭna naviedała «Makdonalds» u Vilni.

«Naša bulba vielmi drennaja. I heta ŭ Biełarusi nie mohuć zrabić bulbu», — ździŭlajecca jana.

Jašče adzin kamientatar zhadaŭ časy, kali ŭ Biełarusi pracavaŭ «Makdonalds».

«Kali ŭ nas byŭ «Makdonalds», bulba była ledź nie najlepšaja. Paśla pierachodu na «Mak.baj» — absalutna drennaja. Adziny plus byŭ, što paśla pierachodu tam sousy stali taksama našaj vytvorčaści i byli ŭ dva razy tańniejšyja. Adnak za hady patrochu i jany vyraŭnialisia [u canie], vytvorca zastaŭsia toj ža».

Zrešty, nie ŭsie ŭdzielniki dyskusii pahadzilisia z krytykaj. A bulbu pa-viaskovamu naohuł chvalać.

Bulba ŭ «Mak.baj» ciapier pastaŭlajecca z Tałačynskaha kansiervavaha zavoda. Dla bulby fry vykarystoŭvajecca sort «Inavatar», a dla recepta pa-viaskovamu — «Julija» i «Mastak».

Kamientary da artykuła