Rasijski «Afrykanski korpus» viarnuŭ kantrol nad Kidalem praz paŭhoda paśla straty horada
Upieršyniu ŭziać Kidal u listapadzie 2023 hoda zmahli najomniki PVK «Vahnier». U krasaviku jany pakinuli horad.
Fota: Afrykanski korpus
Rasijskija vajskoŭcy z «Afrykanskaha korpusa» sumiesna z armijaj Mali viarnuli kantrol nad horadam Kidal na paŭnočnym uschodzie krainy. Jak śćviardžajuć rasijskija vajskoŭcy, apieracyja pa nastupie na hety horad pravodziłasia z 1 pa 7 kastryčnika pry padtrymcy avijacyi, piša Bi-bi-si.
Urad Mali amal 10 hadoŭ nie moh ustalavać kantrol nad Kidalem, jaki byŭ zachopleny tuarehami, što vystupajuć za stvareńnie na poŭnačy krainy niezaležnaj dziaržavy Azavad.
Upieršyniu ŭziać Kidal u listapadzie 2023 hoda zmahli najomniki PVK «Vahnier», paśla čaho rasijski MZS pavinšavaŭ urad u Bamaka z hetym dasiahnieńniem. Adnak paśla śmierci Jaŭhiena Pryhožyna, kali pazicyi najmitaŭ u Mali zaniaŭ padviedamasny rasijskamu Minabarony «Afrykanski korpus», situacyja dla režymu Asimi Hojty imkliva pahoršyłasia.
U krasaviku 2026 hoda stała viadoma, što Kidal znoŭ byŭ pakinuty. Heta stała adčuvalnym imidžavym udaram dla ŭrada Mali. Ciapier ułady krainy zajaŭlajuć pra novuju paśpiachovuju apieracyju na hetym napramku. Pry hetym adkrytym zastajecca pytańnie, jak doŭha ŭdasca ŭtrymlivać kantrol nad horadam.
Adzin z aktyvistaŭ «Frontu vyzvaleńnia Azavada» skazaŭ Ruskaj słužbie Bi-bi-si ŭ adkaz na pytańnie pra situacyju ŭ Kidali: «Kidal byŭ vykarystany ŭ palityčnych metach; u bližejšyja tydni vy atrymajecie adkaz na hetuju situacyju»