Rasija pačała abmiarkoŭvać raźmiaščeńnie data-centraŭ dla ŠI ŭ «družalubnych» krainach
Kiraŭnik Biełaruskaj asacyjacyi vysokich technałohij i ličbavaj infrastruktury Alaksiej Śviancicki ŭžo prapanavaŭ rasijskim kampanijam budavać takija centry ŭ krainie.
Ilustracyjnaje fota Centra apracoŭki danych, fota sotline.ru
Urad Rasii prapracoŭvaje mahčymaść stvareńnia data-centraŭ (centry apracoŭki danych — CAD) dla štučnaha intelektu (ŠI) na terytoryi «družalubnych» krain, u pryvatnaści Biełarusi i Kazachstana. Pra heta piša RBK sa spasyłkaj na krynicy ŭ IT-halinie. U Minličby paćvierdzili, što razhladajucca roznyja varyjanty raźmiaščeńnia data-centraŭ, ale kankretnych rašeńniaŭ pakul niama.
Adna z pryčyn — deficyt vyličalnych mahutnaściaŭ u Rasii. U Maskvie svabodnymi zastajucca kala 50 MVt, čaho chopić na dva—čatyry bujnyja kamiercyjnyja CAD. Pry hetym na maskoŭski rehijon prypadaje bolš za 75% kamiercyjnych mahutnaściaŭ, a da 2032—2033 hadoŭ krainie spatrebicca dadatkova ŭvieści 2,5—3 HVt mahutnaściaŭ. Akramia taho, stojka z abstalavańniem dla ŠI spažyvaje da 40 kVt, tady jak zvyčajnaja — 5—10 kVt.
Kiraŭnik Biełaruskaj asacyjacyi vysokich technałohij i ličbavaj infrastruktury Alaksiej Śviancicki ŭžo prapanavaŭ rasijskim kampanijam budavać CAD u krainie. Jon paviedamiŭ, što viadzie pieramovy na hety kont z prezidentam rasijskaj Asacyjacyi ŭdzielnikaŭ haliny CAD Iharam Darafiejevym.
Siarod mahčymych prajektaŭ — data-centr «Maskva — Minsk» na miažy dźviuch krain.
Adnoj ź pieravah Biełarusi nazyvajuć praficyt elektraenierhii. Premjer-ministr Raman Hałoŭčanka ŭ sakaviku kazaŭ, što kraina hatovaja prapanavać inviestaram i partnioram vyhadnyja ŭmovy ŭ śfiery data-centraŭ.
Kazachstan tym časam raźvivaje prajekt «Dalina CAD» u Ekibastuzie. Jaho mahutnaść pavinna skłaści 300 MVt z mahčymaściu pavieličeńnia da 1 HVt, a abjom inviestycyj aceńvajecca prykładna ŭ $10 młrd. Pahadnieńni ab supracoŭnictvie zaklučanyja z Firebird i Nvidia, zapusk zapłanavany na 2027 hod.