Mužčyna vykłaŭ u instahram fota z džunhlaŭ. Akazałasia, jon vypadkova źniaŭ nieviadomy navucy hihancki vid raśliny
Zvyčajny zdymak z padarožža adnaho amierykanca prymusiŭ brytanskaha batanika niekalki hadoŭ vyvučać spadarožnikavyja karty, a potym adpravicca ŭ ciažkadastupnyja džunhli Kałumbii. Ekśpiedycyja ledź nie skončyłasia niaŭdačaj, ale ŭ apošni momant navukoŭcam pašancavała.
Džeremaja Charys płavaje siarod vielizarnych kruhłych listoŭ harłačykaŭ u race Iniryda. Fota: jeremiahsplants / Instagram
Jak paviedamlaje The Guardian, try hady tamu amierykaniec Džeremaja Charys, jaki kiruje hadavalnikam drapiežnych raślin u ZŠA, apublikavaŭ u instahramie niezvyčajnaje fota z padarožža pa Kałumbii. Na zdymku jon płavaŭ siarod vielizarnych kruhłych listoŭ harłačykaŭ u race Iniryda, što praciakaje praz trapičnyja lasy na ŭschodzie krainy.
Charys byŭ upeŭnieny, što płavaŭ siarod harłačykaŭ Victoria amazonica — viadomaha vidu, jaki raście ŭ basiejnie Amazonki. Ale kali fatahrafiju vypadkova ŭbačyŭ Karłas Mahdalena, śpiecyjalist pa vodnych raślinach z Karaleŭskich bataničnych sadoŭ Kju ŭ Vialikabrytanii, jana jaho zaintryhavała.
Batanik viedaŭ, što ŭ race Iniryda, dzie byŭ zrobleny zdymak, hety vid nie sustrakajecca. Tamu jon zapadozryŭ, što Charys moh sfatahrafavać raniej nieviadomuju navucy raślinu.
Navukoviec źviazaŭsia z aŭtaram zdymka, vyśvietliŭ dakładnaje miesca i pačaŭ rychtavać ekśpiedycyju. Na pošuk finansavańnia, atrymańnie dazvołaŭ i vyvučeńnie spadarožnikavych zdymkaŭ miascovaści pajšło niekalki hadoŭ.
Narešcie Mahdalena razam z supracoŭnikami bataničnaha sadu ŭ Bahacie, stalicy Kałumbii, i pradstaŭnikami miascovych karennych supolnaściej adpraviŭsia ŭ piacidzionnuju ekśpiedycyju ŭ džunhli.
Niekalki dzion jany daśledavali zatoplenyja džunhli, ale patrebnych harłačykaŭ tak i nie znajšli. Kali ŭžo zdavałasia, što daviadziecca viartacca ni z čym, pravadnik, jaki dapamahaŭ ekśpiedycyi, padkazaŭ jašče adno miesca.
Da zvarotnaha samalota zastavałasia ŭsiaho dziesiać hadzin. Daśledčyki vyrašyli vykarystać apošni šaniec i ŭnačy na łodcy adpravilisia da nievialikaha voziera ŭ hłybini zatoplenaha lesu. Tam jany narešcie ŭbačyli raśliny, jakija šukali.
Adkryćcio ź niečakanym praciaham
Navukoŭcy sabrali ŭzory, a ich dalejšaje vyvučeńnie paćvierdziła zdahadku Mahdaleny. Jak paviedamlajecca ŭ časopisie Phytotaxa, heta sapraŭdy novy dla navuki vid hihanckich harłačykaŭ. Jon atrymaŭ nazvu Victoria colombiana — u honar krainy, dzie byŭ znojdzieny.
Karłas Mahdalena pakazvaje nižni bok lista hihanckaha harłačyka Victoria colombiana. Fota: Mauricio Bernal / kew.org
Da hetaha navucy byli viadomyja tolki try vidy hihanckich harłačykaŭ. Heta adny z samych niezvyčajnych vodnych raślin. Ich kruhłyja listy mohuć dasiahać troch mietraŭ u dyjamietry i vytrymlivać vahu maleńkaha dziciaci. Novy vid nastolki vialiki, što jaho zaraśniki možna razhledzieć navat na spadarožnikavych zdymkach.
Pavodle papiarednich acenak, u dzikaj pryrodzie naličvajecca ŭsiaho ad 30 da 50 asobnikaŭ Victoria colombiana. Tamu daśledčyki prykładajuć namahańni, kab adkryty imi vid byŭ uniesieny ŭ Čyrvony śpis Mižnarodnaha sajuza achovy pryrody.
Kab zachavać redkuju raślinu, navukoŭcy płanujuć sabrać jaje nasieńnie i pasprabavać vyraścić harłačyki ŭ Bataničnym sadzie Bahaty. Taksama razhladajecca mahčymaść stvaryć novuju papulacyju ŭ bolš dastupnym voziery na terytoryi karennych supolnaściej.