Čanharski most razburany — važny łahistyčny maršrut rasijskich vojskaŭ atrymaŭ novyja paškodžańni
Čanharski aŭtamabilny most, jaki złučaje anieksavany Krym z akupavanaj častkaj Chiersonskaj vobłaści praz Čanharski praliŭ, atrymaŭ novyja maštabnyja paškodžańni. Pra heta śviedčać spadarožnikavyja zdymki, a taksama kamientary tych, kamu daviałosia jechać pa pantonnaj pierapravie, piša Astra.
Na vieraśnioŭskim videa vidać, što most amal razburany, a aŭtar rolika jedzie za inšymi aŭtamabilami pa časovaj pierapravie.
U kastryčniku źjavilisia źviestki, što jak minimum adzin pralot Čanharskaha mosta abrynuŭsia — heta vidać navat na spadarožnikavych zdymkach.
Dnipro Osint paviedamiŭ, što most jak klučavy suchaputny pierachod nieadnarazova atakavali Siły abarony Ukrainy.
«Na 26 vieraśnia na moście i pierapravie pobač fiksavalisia prynamsi try vialikija praboiny ŭ pałatnie mosta i pierapravy. Heta istotna ŭskładniła ruch i pryviało da zatoru łahistyčnaha transpartu, u tym liku vajskovaha. Na zdymku za 30 vieraśnia ŭžo vidać, što pralot mosta abrynuŭsia», — havorycca ŭ paviedamleńni.
U čatach, dzie abmiarkoŭvajuć darohu ŭ anieksavany Krym, kiroŭcy śćviardžajuć, što abrynulisia dva praloty mosta, tamu transpart nakiroŭvali pa pierapravie z reviersiŭnym rucham. Jašče adzin kiroŭca paviedamiŭ, što ŭ adzin ź dzion usich nakiroŭvali ŭ abjezd pa staroj darozie.
Akramia prablem z Čanharskim mostam, achvotnyja trapić u anieksavany Krym abo vyjechać z paŭvostrava paviedamlali, što pa darozie amal niama pracujučych zapravak, a na tych, što pracujuć, dyzielnaje paliva kaštuje 130—140 rubloŭ, bienzin — 160—200 rubloŭ.
Akramia taho, trasa znachodzicca pad pastajannymi atakami dronaŭ, jakija celać pa hruzavych aŭtamabilach. U paviedamleńni ad 4 kastryčnika adzin z kiroŭcaŭ raskazaŭ, što jamu razam z pasažyrami daviałosia vyskokvać z mašyny, kali mabilnyja ahniavyja hrupy źbivali BPŁA. Pavodle jaho, jon sam bačyŭ, jak «padbili dźvie fury». Jašče adzin kiroŭca paviedamiŭ, što bačyŭ šeść zharełych fur, i papiaredziŭ, što «situacyja pastajanna mianiajecca».
U červieni Hienštab Uzbrojenych sił Ukrainy paviedamlaŭ pra paražeńnie troch čyhunačnych mastoŭ na akupavanych terytoryjach. Zhadvalisia čyhunačny most praz Paŭnočnakrymski kanał u rajonie Razdolnaha, čyhunačny most u rajonie vioski Pietershahien (byłaja Kutuzaŭka) Zaparožskaj vobłaści, a taksama čyhunačny most praź Sivaš u Čanhary. Pieršy asobny šturmavy połk USU taksama paviedamlaŭ pra paražeńnie pantonnaha mosta ŭ Čanhary.