ANT zapuściła intelektualnaje šou, u jakim treba adhadvać kadry z rasijskich sieryjałaŭ «Univier» i «Tatavy dočki»

My pahladzieli šou «Adzin na adzin» i raskazvajem, jak zarabić hrošy na viedańni dziciačych cacak i rasijskich sieryjałaŭ.

Skrynšot: ANT

U efiry ANT źjaviłasia zabaŭlalnaje intelektualnaje šou «Adzin na adzin». Jano padazrona nahadvaje suśvietny chit The Floor. Na resursach The Floor niama infarmacyi, što biełarusam pradali licenziju na prahramu, ANT taksama nie raskryvaje krynicy natchnieńnia.

Jak i ŭ The Floor, u šou ad ANT jość sietka z kletak: tolki ich nie 100, a 49. Na kožnaj kletcy, jak i ŭ The Floor, staić udzielnik. Jamu prysvojvajuć katehoryju, u jakoj hety čałaviek musić šmat viedać. Pieravažna heta ahulnyja temy, nijak nie źviazanyja z toj ci inšaj krainaj: naprykład, adzieńnie, transpart, śviet dziacinstva ci nobieleŭskija łaŭreaty. Byli i nacyjanalna markiravanyja katehoryi, u tym liku biełaruskija pomniki, karta Biełarusi i rasijskija sieryjały.

Skrynšot: ANT

Hulcy vychodziać na dueli adno z adnym, pryčym pieršaha ŭdzielnika abiraje kampjutar, a dalej, kali toj udzielnik nie admaŭlajecca praciahvać hulniu, jon sam vybiraje kankurenta z kletak vakoł jaho. U kožnym raŭndzie hulcy majuć pa 45 siekund času. 

Sama ž hulnia składajecca z taho, što hulcam pakazvajuć vyjavy z pradmietami pa katehoryi, jakija hulajuć u tym raŭndzie, a ŭdzielniki musiać nazvać tyja pradmiety. Kali jany dajuć pravilny adkaz, tajmier spyniajecca i chod pierachodzić da supiernika, a kali nie, tajmier praciahvajecca da pravilnaha adkazu ci da skančeńnia času. Nie viedaješ adkaz — kažy «pas» i karcinku pamianiajuć, ale daviadziecca stracić try siekundy štrafnoha času. Kali tvoj čas skončyŭsia chutčej za čas spabornika, hulnia dla ciabie skončanaja. 

Skrynšot: ANT

Vieści prajekt paklikali Paŭła Filimonava. 40‑hadovy minčuk vyras z mahiloŭskaj lihi KVZ i ŭžo šmat hadoŭ viadzie viasielli, prezientacyi i inšyja padziei. U instahramie Filimonava paznačana, što jon pracuje viadučym na radyjo Supier FM.

Vierniemsia da šou. Pieršym udzielnikam abrali Alaksandra, nastaŭnika historyi i hramadaznaŭstva ź minskaj škoły. Jamu ž dali prava vybrać pieršuju katehoryju. Alaksandr abraŭ «Śviet dziacinstva» i syšoŭsia ŭ dueli z Nastaśsiaj, dyrektarkaj pa ryzykach i pracesach u fintechkampanii, jakaja jamu i sastupiła. Karcinki im pakazvali takija, što nie kožny zmoža chutka zaryjentavacca: akramia zrazumiełych lalek, tam byli i cacki nakštałt jo-jo ci pop-itaŭ.

Vyhladaje, arhanizatary imknulisia padabrać udzielnikaŭ z roznych prafiesij i rehijonaŭ. Pakazali, naprykład, režysiorku z salihorskaha Pałaca kultury, jakaja staviła ŭ tym liku śviata jubileju haziety «Šachcior», supracoŭnicu ŽKH z Červienia i treniera pa boksie z Mahilova. Illa, kiraŭnik učastka z budaŭničaha pradpryjemstva ŭ Salihorsku, pryjšoŭ na ANT u vyšyvancy i pryznaŭsia, što lubić biełaruskuju litaraturu.

Skrynšot: ANT

Da biełaruskich pytańniaŭ u pieršaj sieryi tak i nie dajšli, ale rasijskija sieryjały zakranuli. Katehoryja, adnak, atrymałasia niaŭdałaja dla ŭdzielnic toj dueli: z pakazanych im kadraŭ jany adhadali chiba što «Univier» i «Tatavych dačok» dy spasavali na šmatlikich inšych vyjavach.

Pahulalisia ŭ šou i z zahadkami — jak abiacaŭ Pavieł Filimonaŭ, jany buduć «kananičnyja», na jakich «my vyraśli». Naprykład, byli zahadki pra «zimoj i letam adnym koleram» ci pra «krasnuju dziavicu».

Skrynšot: ANT

Pieramožca kožnaha z raŭndaŭ dałučaje da svajej kletki kletku spabornika, i toj, chto vyšturchnie z hulniavoha pola inšych hulcoŭ, atrymaje hałoŭny pryz — 10 tysiač rubloŭ. Pieršaha vypusku na heta nie chapiła, u im vyznačyli tolki pramiežkavaha pieramožcu.

Heta Darja, studentka z Marjinaj Horki, jakaja vučycca ŭ Akademii kiravańnia. Dziaŭčyna padklučyłasia da hulni tolki pad kaniec sieryi, ale ŭ vyniku atrymała jašče try dadatkovyja jačejki. Jak udzielnicy, što zaniała bolš za ŭsio kletak za vypusk, joj dali tysiaču rubloŭ.

Darja, pieršaja pramiežkavaja pieramožca šou. Skrynšot: ANT

Kamientary da artykuła