Amierykanskaja palicyja atrymała ŠI-instrumient, jaki vyznačaje dom pa adnym fota interjera
Raven šukaje žyllo pa detalach pakoja — biez kaardynat i inšych mietadanych zdymka. Raspracoŭščyki prapanujuć vykarystoŭvać jaho ŭ rasśledavańniach handlu ludźmi.
Kampanija Graylark Technologies dadała ŭ svoj instrumient Raven mahčymaść šukać žyllo pa fatahrafijach interjeraŭ. Dostup da servisu, jaki raniej nazyvaŭsia GeoSpy, užo nabyli palicyja Łos-Andželesa i ofis šeryfa akruhi Majami-Dejd, piša 404 Media.
U adnym z demanstracyjnych videa karystalnik zahružaje zdymak pralnaj i sušylnaj mašyn, uziaty z sacsietki X, i vybiraje rehijon pošuku. Praź niekalki siekund Raven pakazvaje žyllo ŭ amierykanskim horadzie Šarłat. Žurnalisty znajšli adpaviednuju abjavu na Airbnb: na jaje fatahrafijach — toj samy interjer.
U inšym prykładzie fota vannaha pakoja pryvodzić da doma ŭ Mantesita ŭ Kalifornii, jaki zdajuć praz Vrbo.
Jak pakazana ŭ videa, Raven moža znajści kankretny dom pa adnym zdymku interjera, nie vykarystoŭvajučy kaardynaty ci inšyja mietadanyja, prymacavanyja da vyjavy.
Jon šukaje nie tolki identyčnyja fatahrafii, ale i charakternyja detali pamiaškańnia na inšych zdymkach. Tamu kadry mohuć być zroblenyja z roznych rakursaŭ i ŭ rozny čas.
«Dla śledčych, jakija rasśledujuć spravy ab handli ludźmi i ekspłuatacyi, hetaja suviaź moža pieratvaryć nieapaznany pakoj u začepku pra miescaznachodžańnie, jakuju jany mohuć pravieryć i vykarystać u rasśledavańni», — napisaŭ kiraŭnik Graylark Daniel Chajnien.
Chajnien raskazvaŭ, što zdolnaść raspaznavać interjery spačatku ździviła samich raspracoŭščykaŭ. Padčas testavańnia jon zahruziŭ sełfi svajoj dziaŭčyny ŭ vannaj, a sistema paznačyła San-Francyska. Paśla hetaha jon pravieryŭ jaje na zdymkach z Zillow: pavodle jaho, u dzieviaci vypadkach ź dziesiaci sistema pravilna vyznačała horad.
Heta nie aznačaje, što Raven moža znajści luby dom u śviecie. Častku funkcyj vykarystoŭvajuć madeli, padrychtavanyja dla kankretnych haradoŭ. Naprykład, palicyja Majami-Dejd atrymała madel, navučanuju śpiecyjalna dla hetaj akruhi.
Airbnb zajaviła, što nie supracoŭničaje z Graylark i zabaraniaje aŭtamatyzavany zbor danych sa svajho sajta. Płatforma vydalaje hieamietki z fota i raskryvaje adras žylla hościu tolki paśla paćviardžeńnia braniravańnia. Zillow taksama paviedamiła, što taki zbor danych parušaje jaje praviły.
Praktyčnyja vyniki servisu pakul bolš ścipłyja za rekłamu. Pradstaŭnik ofisa šeryfa Majami-Dejd raniej paviedamiŭ 404 Media, što vykarystańnie instrumienta zastavałasia pieravažna ekśpierymientalnym i nie pryviało da istotnych praryvaŭ u rasśledavańniach abo aryštaŭ.
Spačatku servis byŭ dastupny amal lubomu achvotnamu. Ale žurnalisty vyjavili ŭ supolnaści karystalnikaŭ prośby dapamahčy sačyć za žančynami. Paśla zvarotu 404 Media za kamientarom kampanija abmiežavała dostup dziaržaŭnymi strukturami i karparatyŭnymi klijentami.