Pasłańniki Trampa zajavili Kijevu, što sprabujuć viarnuć Pucina za stoł pieramovaŭ z dapamohaj dyzielnaj ździełki
Taksama padčas pieramovaŭ pradstaŭniki amierykanskaha prezidenta jašče raz zaklikali Ukrainu spynić udary pa rasijskich naftapierapracoŭčych zavodach (NPZ).
Fota: AP
Śpiecpasłańnik prezidenta ZŠA Styvien Uitkaf i ziać amierykanskaha lidara Džared Kušnier na pieramovach z pradstaŭnikami Ukrainy zajavili, što dyzielnaja ździełka z Rasijaj zaklikanaja viarnuć Uładzimira Pucina za stoł pieramovaŭ, paviedamili daśviedčanyja krynicy Reuters
Pavodle ich słoŭ, amierykanskija pieramoŭščyki adznačyli, što Pucin dahetul nie byŭ hatovy vieści pieramovy ab spynieńni vajny, ale pahadnieńnie ab pastaŭkach 2,25 młn baralaŭ rasijskaha dyzielnaha paliva na rynak ZŠA pavinna «źmiakčyć» jaho pazicyju i padać sihnał pra adkrytaść Trampa da supracoŭnictva z Rasijaj.
Taksama padčas pieramovaŭ pradstaŭniki amierykanskaha prezidenta jašče raz zaklikali Ukrainu spynić udary pa rasijskich naftapierapracoŭčych zavodach (NPZ).
«Ideja zaklučałasia ŭ tym, što ZŠA mahli b viarnucca da Rasii i skazać: «Bačycie, ukraincy spynili nanosić udary, i my zaklučyli z vami hetuju ździełku. Ciapier vaša čarha niešta zrabić»,— patłumačyŭ adzin z surazmoŭcaŭ Reuters.
Pry hetym ukrainskaja delehacyja daterminova pierapyniła pieramovy z pradstaŭnikami prezidenta ZŠA. Pavodle źviestak krynic Financial Times, pryčynaj stała dyzielnaja ździełka, jakaja «źnianacku zaśpieła» ŭkrainskich pieramoŭščykaŭ, piša Moscow Times.
Pradstaŭniki Kijeva, jakija prysutničali na sustrečy, skazali Reuters, što skieptyčna pastavilisia da padychodu ZŠA, jakija sprabujuć ułahodzić Rasiju z dapamohaj ekanamičnych ździełak. Da hetaha nivodnaja z takich sprobaŭ nie pryviała da spynieńnia ahniu.
Krynica ahienctva, blizkaja da Kramla, zajaviła, što Pucin vierniecca za stoł pieramovaŭ tolki tady, kali «atrymaje astatnija 11% Danbasa, jakija zmoža pradstavić unutry krainy jak pieramohu».
Prezident Ukrainy Uładzimir Zialenski raniej adchiliŭ mahčymaść sastupić terytoryi Rasii, ale dapuściŭ zamarožvańnie kanfliktu pa isnaj linii frontu.
Miž tym sam Tramp ličyć, što Pucin prajaŭlaje bolšuju zacikaŭlenaść u spynieńni vajny, čym ukrainski lidar.
«My pavinny zrabić tak, kab Zialenski zachacieŭ zaklučyć pahadnieńnie», — zajaviŭ kiraŭnik Biełaha doma.
Pry hetym jon pryznaŭ, što Maskva i Kijeŭ «nie viedajuć», jak zaviaršyć kanflikt, a pamiž Pucinym i Zialenskim «isnuje vielmi mocnaja ŭzajemnaja niepryjaznaść».
Niahledziačy na heta, Tramp paabiacaŭ damahčysia taho, kab baki zaklučyli mirnaje pahadnieńnie.