Sibiha: Mienš čym za dva hady Ukraina prajšła šlach ad «u vas niama kart» da «nie hulajcie svaimi kartami»
Pośpiechi Ukrainy ŭ supraćstajańni rasijskaj ahresii prymusili jaje partnioraŭ pa-inšamu aceńvać mahčymaści Kijeva, ličyć ministr zamiežnych spraŭ Ukrainy Andrej Sibiha. Na Varšaŭskim forumie biaśpieki jon nahadaŭ, jak źmianiłasia rytoryka Vašynhtona ŭ dačynieńni da Ukrainy.
Mienš čym za dva hady Ukraina prajšła šlach ad situacyi, kali padčas svarki ŭ Avalnym kabiniecie Biełaha doma joj kazali, što ŭ jaje niama kart na rukach, da situacyi, kali joj kažuć nie hulać svaimi kartami. Pra heta zajaviŭ ministr zamiežnych spraŭ Ukrainy Andrej Sibiha padčas Varšaŭskaha forumu biaśpieki, pieradaje «Ukrinfarm».
«Mienš čym za dva hady my prajšli šlach ad situacyi, kali nam kazali, što ŭ nas na rukach niama nijakich kart, da situacyi, kali nam kažuć nie hulać svaimi kartami. Heta sapraŭdnaje pryznańnie Ukrainy. Heta naša sapraŭdnaje dasiahnieńnie i važny ŭrok, jaki my zasvoili», — adznačyŭ Sibiha.
Jon dadaŭ, što na froncie ciapier abaraniajuć ideju svabody, i Ukraina płacić za heta najvyšejšuju canu.
«Mienavita ciapier va Ukrainie vyrašajucca budučynia Jeŭropy, hłabalnaja architektura biaśpieki i los mižnarodnaha prava. Bo linija frontu va Ukrainie — heta pieršaja linija abarony Jeŭropy», — padkreśliŭ ministr.
Fraza «ŭ vas niama kart» adsyłaje da svarki ŭ Avalnym kabiniecie ŭ lutym 2025 hoda pamiž Donaldam Trampam, vice-prezidentam ZŠA Džej Dzi Vensam i Uładzimiram Zialenskim.
Ciapier ža ZŠA zaklikajuć Ukrainu nie bić pa rasijskich NPZ.