Arhanizatara zabojstva repiera Tupaka Šakura pasadzili na 40 hadoŭ
Zabojstva adbyłosia 30 hadoŭ tamu.
Duejn «Kifi Dzi» Devis. Fota: Steve Marcus-Pool/Getty Images
Sud u Łas-Viehasie ŭ aŭtorak pryhavaryŭ 63‑hadovaha Duejna «Kifi Dzi» Devisa da 40 hadoŭ pazbaŭleńnia voli pa spravie ab zabojstvie lehiendarnaha repiera Tupaka Šakura ŭ 1996 hodzie. U kancy žniŭnia sud prysiažnych pryznaŭ jaho vinavatym, piša Bi-bi-si.
«Na praciahu troch hadoŭ ja čuła ad vas roznyja varyjanty adnaho i taho ž: «Tak, ja byŭ da hetaha datyčny. Ale ciapier ja inšy čałaviek. Ja pakinuŭ minułaje zzadu. Ja vybraŭsia z Komptana. Ciapier ja dziadula»», — zajaviła sudździa Karli Kirni, abviaščajučy prysud.
«Vy nie majecie prava zabirać čałavieka ŭ jaho siamji. Vy nie majecie prava pazbaŭlać jaho samoha žyćcia, usioj jaho budučyni, a potym prosta syści, nibyta ničoha nie zdaryłasia», — skazała jana, źviartajučysia da abvinavačanaha.
Nieviadomy adkryŭ ahoń z aŭtamabila, jaki prajazdžaŭ mima, 7 vieraśnia 1996 hoda, kali Tupak razam z muzyčnym mahnatam Meryjonam «Šuham» Najtam nakiroŭvaŭsia ŭ kłub u Łas-Viehasie.
Muzykant pamior 13 vieraśnia ad atrymanych ranieńniaŭ. «Šuh» vyžyŭ.
Duejn «Kifi Dzi» Devis — adziny čałaviek, jakoha pryciahnuli da adkaznaści za zabojstva Tupaka Šakura. Prakurory zajavili, što ŭ ich niama dastatkovych padstaŭ, kab vystaŭlać abvinavačańni kamu-niebudź jašče.
Troje inšych mužčyn, jakija, jak miarkujecca, znachodzilisia ŭ aŭtamabili, ź jakoha zastrelili repiera, užo pamierli.
Devis byŭ adnym ź lidaraŭ bandy South Side Compton Crips, u toj čas jak «Šuh» i jaho muzyčny łejbł Death Row Records, ź jakim u Tupaka byŭ kantrakt, byli źviazanyja z kankurujučaj bandaj Mob Piru Bloods.
U 2019 hodzie «Kifi Dzi» vydaŭ miemuary, u jakich raspavioŭ pra zabojstva repiera. Tupak Šakur pabiŭsia ź plamieńnikam Devisa Arłanda Andersanam, i člen South Side Compton Crips vyrašyŭ nie pakidać hety vypadak biez pakarańnia.
«Kifi Dzi» zajaviŭ, što znachodziŭsia ŭ aŭtamabili, ź jakoha stralali ŭ muzykanta, i što mienavita jon pieradaŭ pistalet, vykarystany dla zabojstva.
Devisa aryštavali ŭ 2023 hodzie. Jon sprabavaŭ dystancyjavacca ad svaich miemuaraŭ, śćviardžajučy, što apublikavaŭ ich dziela hrošaj i słavy i navat nie viedaŭ, pra što mienavita ŭ ich havorycca. Jaho abarona ŭ sudzie prytrymlivałasia hetaj viersii.
«Vy čytajecie knihu, jakaja źjaŭlajecca vydumkaj, a nie faktam, ale dziaržava choča, kab vy pavieryli, što heta pryznańnie», — zajaviŭ advakat «Kifi Dzi» Majkł Sanft.
Niahledziačy na heta, prysiažnyja pryznali Devisa vinavatym u zabojstvie pieršaj stupieni z prymianieńniem zbroi. Maksimalnaje pakarańnie pavodle hetaha artykuła — pažyćciovaje źniavoleńnie biez prava na ŭmoŭna-daterminovaje vyzvaleńnie.