Na čyhunačnych pierajezdach źjavicca sistema, jakaja budzie zahadzia papiaredžvać mašynistaŭ pra niebiaśpieku

Na biełaruskich čyhunačnych pierajezdach płanujuć ustalavać sistemu, jakaja zmoža raspaznavać aŭtamabili, ludziej i žyvioł na puciach i aŭtamatyčna papiaredžvać mašynistaŭ pra niebiaśpieku. Paviedamleńnie budzie pastupać, kali ciahnik znachodzicca na adlehłaści da troch kiłamietraŭ ad pierajezda, paviedamlaje pres-słužba Biełaruskaj čyhunki.

Zdymak ilustracyjny. Fota: Wikimedia Commons

Pahadnieńnie ab stvareńni sistemy 14 kastryčnika padpisali Biełaruskaja čyhunka i «Biełtelekam». Ukaranieńnie sistemy zapłanavanaje na 2027 hod.

Nieabchodnaść novaj technałohii źviazanaja z tym, što ciapier u Biełarusi naličvajecca 66 čyhunačnych pierajezdaŭ z abmiežavanaj bačnaściu. Jany raźmieščanyja na pavarotach, dzie ciahniki ruchajucca z chutkaściu bolš za 100 km/h. Kali na takim pierajeździe zatrymajecca aŭtamabil abo sielskahaspadarčaja technika, mašynist moža nie paśpieć paźbiehnuć sutyknieńnia.

Śpiecyjalisty Biełaruskaj čyhunki vyvučyli šeść technałohij vyjaŭleńnia pieraškod i pieradačy papiaredžańniaŭ u kabinu łakamatyva. U vyniku vyrašyli vykarystać sistemu videaanalityki, zasnavanuju na technałohijach «Biełtelekama» i techničnych srodkach čyhunki.

Kamiery videanazirańnia buduć sačyć za situacyjaj na pierajezdach. Kali sistema raspaznaje čałavieka, žyviołu, aŭtamabil abo inšy starońni abjekt na puciach, jana aŭtamatyčna pieradaść papiaredžańnie mašynistu praź ciahnikovuju radyjosuviaź. Paviedamleńni zmohuć atrymlivać łakamatyŭnyja bryhady, čyje ciahniki znachodziacca na adlehłaści da troch kiłamietraŭ ad niebiaśpiečnaha pierajezda.

Kamientary da artykuła