Minčuk narvaŭsia na dziasiatuju kryminalnuju spravu praz sapsavany salcison
U Minsku nakiravali ŭ sud kryminalnuju spravu suprać 46‑hadovaha miascovaha žychara, jakoha abvinavačvajuć u chulihanstvie. Mužčyna, jaki raniej dzieviać razoŭ pryciahvaŭsia da kryminalnaj adkaznaści, raźbiŭ škło ŭ dźviarach kramy, bo jamu zdałosia, što jamu pradali sapsavany kuryny salcison, piša ahienctva «Minsk-Naviny».
Fota ilustracyjnaje
U sakaviku 2026 hoda minčuk vyzvaliŭsia ź miescaŭ pazbaŭleńnia voli, dzie adbyvaŭ pakarańnie za rabavańnie. Adnak užo ŭ červieni znoŭ učyniŭ złačynstva.
Uviečary, znachodziačysia ŭ stanie ałkaholnaha apjanieńnia, mužčyna kupiŭ u kramie na vulicy Łabanka kuryny salcison i pałovu bułki chleba. Paśla hetaha jon sieŭ pierakusić na dziciačaj placoŭcy niepadalok. Razharnuŭšy pradukt, minčuk vyrašyŭ, što toj sapsavany, i viarnuŭsia da kramy. Ale jana ŭžo była začynienaja. Mužčyna pačaŭ stukać u dźviery, a kali nichto nie adčyniŭ, udaryŭ kułakom pa škle i raźbiŭ jaho.
Pra zdareńnie paviedamili milicyi pradaŭcy, jakija jašče nie paśpieli pajści dadomu. Mužčynu chutka zatrymali i raspačali suprać jaho novuju kryminalnuju spravu.
Pavodle namieśnika prakurora Frunzienskaha rajona Andreja Sierbuna, abvinavačany maje bazavuju adukacyju, raźviedzieny i pracuje hruzčykam. Raniej jaho dzieviać razoŭ pryciahvali da kryminalnaj adkaznaści, u šaści vypadkach — za złačynstvy suprać ułasnaści. U jaho zastajecca niepahašanaja sudzimaść.
Mužčynu abvinavačvajuć u chulihanstvie — naŭmysnych dziejańniach, jakija hruba parušajuć hramadski paradak, vyjaŭlajuć vidavočnuju niepavahu da hramadstva i supravadžajucca paškodžańniem abo źniščeńniem čužoj majomaści. Havorka idzie pra častku 1 artykuła 339 Kryminalnaha kodeksa.
Svaju vinu minčuk całkam pryznaŭ, ale škodu ŭ pamiery 575 rubloŭ nie kampiensavaŭ. Pavodle zaklučeńnia ekśpiertaŭ, jon maje patrebu ŭ prymusovym lačeńni ad chraničnaha ałkahalizmu i narkamanii.
U dačynieńni da abvinavačanaha abrali mieru strymańnia ŭ vyhladzie padpiski ab niavyjeździe i naležnych pavodzinach.
Čytajcie taksama:
Zatrymali chakieraŭ, jakija ŭzłamali «DoDo Picu». Siarod ich jość i biełarus