Biełarusy ŭdzielničali ŭ apieracyi «Vivaldzi». Ich padraździaleńnie ŭziało 20 pałonnych i źniščyła bolš za sto bajcoŭ praciŭnika
Siarod zabitych znojdzieny i rasijski najmit z Mahilova, 36‑hadovy Raman Kandracienka.
Biełaruskija dobraachvotniki ŭ vyzvalenym nasielenym punkcie Novaje
U apieracyi «Vivaldzi» aktyŭny ŭdzieł brali biełaruskija dobraachvotniki, najpierš bajcy Biełaruskaha dobraachvotnickaha korpusa. BDK dziejničaŭ u składzie raźviedvalnaha bataljona HATRED (3‑ia šturmavaja bryhada) u jakaści raźviedvalnaj piachotnaj roty. Častka dobraachvotnikaŭ taksama vykonvała inšyja śpiecyjalnyja zadačy
Detali ŭdziełu biełarusaŭ u apieracyi «Vivaldzi» raskazaŭ u svaim telehram-kanale były palitviazień Kim Samusienka.
Biełaruskija dobraachvotniki ŭdzielničali ŭ apieracyjach u rajonie nasielenych punktaŭ Redkadub, Novaje, Lipavaje, Kaciarynaŭka i Zialonaja Dalina, a taksama ŭ lesapałosach kala Kałodzieziaŭ, Ivanaŭki i Novalubaŭki.
Pavodle źviestak padraździaleńnia, na rachunku biełaruskich bajcoŭ — bolš za sotniu źniščanych vajskoŭcaŭ praciŭnika, jašče 20 byli ŭziatyja ŭ pałon.
Siarod zabitych byŭ i hramadzianin Biełarusi, 36‑hadovy Raman Kandracienka.
Hod tamu, 10 vieraśnia 2025 hoda, u adnym z mahiloŭskich pablikaŭ źjaviłasia abviestka pra jaho vyšuk. Akazałasia, što jon za hety čas naniaŭsia ŭ rasijskaje vojska.
Adzin ź biełaruskich dobraachvotnikaŭ raskazaŭ Kimu Samusienku niekatoryja detali hetaj apieracyi.
«Padčas pieršaha vychadu chłopcy ŭziali ŭ pałon kamandziraŭ uzvodaŭ i kamandzira raźviedvalnaj roty praciŭnika. Sabrali šmat infarmacyi pra abstanoŭku na linii bajavoha sutyknieńnia i ŭ tyłach praciŭnika. Całkam pierachapiŭšy inicyjatyvu, našy hrupy zachodzili hłyboka ŭ tył praciŭnika, da pazicyj varožaj aeravyviedki i artylerystaŭ. Paśpiachova brali pałonnych i spyniali łahistyku», — raskazaŭ bajec.
Jon kaža, što za 2026 hod źmianiłasia šmat aśpiektaŭ.
Zaraz piachotnaj raźviedcy stała składaniej dabiracca da zony intaresu. Heta patrabuje niekalkich dzion maršu, novych pryncypaŭ farmavańnia hrup i ešałanavańnia, maskavańnia, suviazi.
Vorah vykarystoŭvaje ŭdarnyja drony, dystancyjnaje minavańnie, artyleryju i navat avijacyju.
Siarod źmien — naprykład, praca ŭnačy ciapier amal nie vykonvajecca praz raspaŭsiudžanaść aeraraźviedki ź ciepłavymi i infračyrvonymi kamierami.
«Možna skazać, što ciapier našy vajary pieražyvajuć najlepšy pieryjad uzdymu. Atmaśfiera pačatku 2022 hoda, ale ź vialikim vopytam i šyrejšymi mahčymaściami». Na žal, vajna nie abychodzicca biez ranieńniaŭ. Padčas apieracyi ciažkaje ranieńnie atrymaŭ adzin ź biełaruskich dobraachvotnikaŭ», — raskazaŭ Kimu Samusienku biełaruski dobraachvotnik.
Apieracyja «Vivaldzi» pačałasia ź likvidacyi rasijskaj infiltracyi ŭ rajonie horada Liman, ale pierarasła ŭ maštabny kontrnastup.
Bryhadny hienierał USU Andrej Bilecki, jaki kamandavaŭ apieracyjaj, raskazaŭ, što za čas apieracyi pad kantrol Ukrainy viarnuli 16 viosak i vyzvalili 277 km².
«My nie dali praciŭniku abyści Słavianska-Kramatarskuju ahłamieracyju z fłanhaŭ i ŭziać jaje ŭ abcuhi, a taksama abaranili trasu Charkaŭ — Słaviansk. Praciŭnik nie zmoh pierarezać klučavuju łahistyčnuju arteryju našaj hrupoŭki na Danbasie. My sarvali nastup hrupoŭki «Zapad» i prymusili jaje pierakidvać častku padraździaleńniaŭ 1‑j tankavaj armii, što asłabiła cisk na Kupiansk-Vuzłavy», — zajaviŭ Andrej Bilecki.
Andrej Bilecki. Skryn videa: RomanBebekh / YouTube
Na apublikavanaj francuzskim OSINT-analitykam Klemanam Malenam animacyi vidać, jak źmianiałasia linija frontu z 22 maja da 5 vieraśnia. Ukrainskija vojski pastupova atakavali fłanhi rasijskaha vystupu, paśla čaho adkinuli praciŭnika ŭ bok raki Žarabiec, Nieŭskaha i Makiejeŭki.
Takim čynam, vyniki prykładna hoda rasijskaha nastupu na hetym učastku ŭ značnaj stupieni byli stračanyja.