Raptoŭny pažar na vajskovaj bazie ŭ Kanadzie: čaćviora zahinułych, 19 čałaviek u krytyčnym stanie
Premjer-ministr Mark Karni nazvaŭ zdareńnie adnoj z samych ciažkich trahiedyj dla kanadskaha vojska.
AP Photo/Ty O'Neil
Achviarami najmacniejšaha pažaru, jaki ŭ subotu achapiŭ vajskovuju bazu ŭ kanadskaj pravincyi Albierta, stali čaćviora vajskoŭcaŭ, zajaviŭ u niadzielu premjer-ministr Mark Karni. Jon nazvaŭ toje, što adbyłosia, adnoj z samych ciažkich trahiedyj dla kanadskaha vojska. U balnicach zastajucca jašče 39 čałaviek, 19 ź ich — u krytyčnym stanie, piša Bi-bi-si.
Pavodle źviestak uładaŭ, pažar pačaŭsia z tleńnia travy prykładna za kiłamietr ad bazy. Ahoń imkliva raspaŭsiudziŭsia pa terytoryi palihona na bazie kanadskich uzbrojenych sił Uejnrajt, raźmieščanaj prykładna za 210 kiłamietraŭ na ŭschod ad Edmantana, stalicy pravincyi Albierta.
U hety čas pravodzilisia vučeńni. Jak paviedamiŭ žurnalistam kamandzir 1‑j dyvizii, jakaja bazujecca ŭ Edmantanie, Uejd Ratlend, pažar razhareŭsia z-za mocnaha vietru, paryvy jakoha dasiahali 96 km/h. Pry hetym da pačatku ŭzharańnia chutkaść vietru nie pieravyšała 50 km/h.
Hienierał Ratlend apisaŭ raptoŭny paryŭ vietru i nastupnaje za im raspaŭsiudžvańnie ahniu jak «niezvyčajnuju, imklivuju» źjavu — połymia pieraadoleła kiłamietr usiaho za 30—60 siekund.
«Ja, viadoma, nikoli ničoha padobnaha nie bačyŭ», — skazaŭ hienierał.
Ułady nazvali imiony zahinułych: siaržant Morhan Vonh, radavy Šon Fareł, radavy Ejdan Hułdynh i radavy Chejden Likiemark.
Vystupajučy ŭ niadzielu sa zvarotam da naroda, premjer-ministr Kanady nazvaŭ toje, što adbyłosia, «adnoj z najciažejšych trahiedyj dla ŭzbrojenych sił na terytoryi Kanady ŭ mirny čas».
«Kraina smutkuje pa advažnych vajskoŭcach našych uzbrojenych sił, jakich my stracili», — skazaŭ Karni. Jon rasparadziŭsia pryspuścić dziaržaŭnyja ściahi na ŭsich fiederalnych budynkach pa ŭsioj krainie ŭ pamiać pra zahinułych.
Premjer-ministr Albierty Daniel Śmit zajaviła, što mnohim paciarpiełym spatrebicca «niekalki tydniaŭ ci miesiacaŭ» śpiecyjalizavanaj intensiŭnaj miedycynskaj dapamohi. Pavodle jaje źviestak, z 39 paciarpiełych, jakija znachodziacca ŭ balnicy, prynamsi 19 čałaviek — u krytyčnym stanie.
Pavodle słoŭ Ratlenda, kali pačaŭsia pažar, 85 vajskoŭcaŭ bataljona lohkaj piachoty prachodzili na bazie, raźmieščanaj u preryjach, «intensiŭnuju» bajavuju padrychtoŭku z vykarystańniem bajavych bojeprypasaŭ.
Sałdaty rychtavalisia da adpraŭki ŭ Łatviju, dzie ciapier razhornuta najbujniejšaja zamiežnaja vajennaja misija Kanady.
«Na terytoryi vučebnaha centra Uejnrajt u hety čas aktyŭna vykarystoŭvalisia roznyja vidy ŭzbrajeńnia», — skazaŭ hienierał, udakładniŭšy, što havorka idzie pra hranatamioty, hranaty, strałkovuju zbroju i bojeprypasy.
Ratlend zajaviŭ, što rasśledavańnie zdareńnia praciahvajecca, i admoviŭsia vykazvać zdahadki pra pryčyny ŭzharańnia travy.
Pavodle jaho słoŭ, ułady nie ličać, što razhalinavanaja naftahazavaja infrastruktura rehijona mieła dačynieńnie da zdareńnia. Jon taksama vyklučyŭ «źniešniaje ŭmiašańnie».
«Mahu skazać, što ŭ toj momant na terytoryi palihona adnačasova pravodziłasia niekalki vučebnych mierapryjemstvaŭ, — paviedamiŭ Ratlend. — Z-za niezvyčajna mocnaha vietru ahoń pačaŭ imkliva raspaŭsiudžvacca i źmianiŭ kirunak u bok administracyjnaj zony palihona».
Zhodna z danymi pierapisu nasielnictva, pa stanie na 2021 hod na bazie Uejnrajt było 1310 vajskoŭcaŭ i cyvilnych supracoŭnikaŭ. Na terytoryi bazy raźmieščany centr padrychtoŭki vojskaŭ i pravodziacca vučeńni suchaputnych sił. Premjer-ministr Karni paviedamiŭ, što paciarpiełyja ŭ vyniku subotniaha pažaru prybyli z vajennych baz z usioj krainy.
Vajskovyja i cyvilnyja pažarnyja zmahalisia z ahniom va «ŭmovach, ciažejšych za jakija ciažka sabie ŭjavić», raspavioŭ premjer-ministr.
Horad Uejnrajt z nasielnictvam kala 6600 čałaviek raźmieščany na poŭnač ad vajennaj bazy. Municypalnyja ŭłady paviedamili ŭ sacyjalnych sietkach, što ahoń pierakinuŭsia praz aharodžu bazy na prylehłuju terytoryju, adnak rasparadžeńniaŭ ab evakuacyi nie pastupała. U niadzielu było zajaŭlena, što dalejšaha raspaŭsiudžvańnia pažaru za jaho ciapierašnija miežy nie čakajecca.
Pažar pačaŭsia ŭ subotu kala 16:00 pavodle miascovaha času. Zaraz uzharańnie łakalizavana.
Mer horada Uejnrajt Brus Pju raspavioŭ BBC, što ratavalniki zastajucca na miescy zdareńnia, kab praduchilić mahčymaje adnaŭleńnie pažaru.
Uzbrojenyja siły Kanady ŭ zajavie, apublikavanaj u niadzielu, adznačyli: «Choć rasśledavańnie zdareńnia praciahvajecca, na hety momant niama nijakich prykmiet taho, što toje, što adbyłosia, stała vynikam terarystyčnaj dziejnaści».
«My nie ličym, što hety [incydent] źviazany z naftahazavaj infrastrukturaj abo jakim-niebudź źniešnim umiašańniem», — skazaŭ na bryfinhu hienierał Ratlend.