U Polščy raskryli złačynnuju hrupu, jakaja admyła 77 miljonaŭ jeŭra. Siarod zatrymanych — biełaruska
Usiaho zatrymanyja dzieviać čałaviek. Im pahražaje da 15 hadoŭ turmy.
U Polščy raskryli mižnarodnuju złačynnuju hrupu, jakuju padazrajuć u admyvańni hrošaj. Pavodle danych śledstva, jaje ŭdzielniki praviali finansavyja apieracyi na ahulnuju sumu bolš za 337 młn złotych (77 miljonaŭ jeŭra). U Varšavie zatrymali dzieviać čałaviek, siarod jakich adna hramadzianka Biełarusi i vosiem hramadzian Ukrainy. Pra heta paviedamiła Varmina-Mazurskaja pamiežnaja słužba Polščy, piša Most.
Pavodle danych śledstva, złačynnaja hrupa dziejničała ŭ piaci polskich haradach: Varšavie, Lublinie, Urocłavie, Katavicach i Hdańsku. Jaje ŭdzielniki admyvali hrošy, atrymanyja złačynnym šlacham, u tym liku ŭ vyniku machlarstva, źviazanaha ź inviestycyjnymi płatformami i ŭkładańniami ŭ kryptavaluty.
Pavodle viersii śledstva, hrupaj kiravaŭ 34‑hadovy hramadzianin Ukrainy. Jon raźmiarkoŭvaŭ zadačy pamiž udzielnikami, davaŭ ukazańni i prymaŭ klučavyja rašeńni adnosna atrymańnia najaŭnych hrošaj i ich dalejšaha pieramiaščeńnia jak u Polščy, tak i za miažoj.
Dla admyvańnia hrošaj vykarystoŭvali abmiennyja punkty i fiktyŭnyja ździełki kupli zołata. Ahulnaja suma praviedzienych apieracyj pieravysiła 337 młn złotych.
Apieracyju praviali supracoŭniki polskaj Pamiežnaj słužby sumiesna z Centralnym biuro pa baraćbie z kibierzłačynnaściu i Ahienctvam unutranaj biaśpieki. Siarod dzieviaci zatrymanych — piać mužčyn i try žančyny z Ukrainy, a taksama hramadzianka Biełarusi.
Pravaachoŭniki praviali pieratrusy ŭ žyłych pamiaškańniach, ofisach i abmiennych punktach. Jany kanfiskavali zołata i hrošy na ahulnuju sumu bolš za miljon złotych (bolš za 230 tysiač jeŭra), a taksama kampjutary i telefony.
Pavodle rašeńnia sudu šaściarych zatrymanych aryštavali na try miesiacy, jašče adnaho čałavieka — na dva miesiacy. U dačynieńni da dvuch astatnich užyli majomasnaje paručalnictva, palicejski nahlad i zabaronu na vyjezd z Polščy.
Zatrymanym pahražaje da 15 hadoŭ pazbaŭleńnia voli. Rasśledavańnie viadziecca pad nahladam Rehijanalnaj prakuratury ŭ Łodzi.