ZŠA pryhrazili Jeŭropie razburalnymi mierami ŭ adkaz u vypadku abmiežavańniaŭ dla Starlink pry raźmierkavańni častot
Płany jeŭrapiejskich čynoŭnikaŭ i parłamientaryjaŭ addać pryjarytet kampanijam Staroha Śvietu pry raźmierkavańni častot dla spadarožnikavaj suviazi sutyknulisia z supraciŭleńniem Vašynhtona.
Fota: Tony Webster CC BY 2.0
Pasoł ZŠA ŭ ES Endru Pazder pryhraziŭ razburalnymi mierami ŭ adkaz u dačynieńni da jeŭrapiejskich kampanij, kali Brusiel abmiažuje dostup amierykanskich kankurentaŭ da svajho rynku, najpierš kampanii SpaceX Iłana Maska. Uličvajučy maštaby amierykanskaha rynku, nastupstvy dla jeŭrapiejskich apierataraŭ buduć vielmi balučymi, papiaredziŭ jon u razmovie z Financial Times, piša Moscow Times.
U ES sprabujuć źnizić zaležnaść ad amierykanskich technałohij praz aściarohi nakont niepradkazalnych dziejańniaŭ Donalda Trampa i ryzyk, źviazanych z daminavańniem zamiežnych kampanij u śfiery krytyčna važnaj infrastruktury.
Adnak prapanavanyja źmieny ŭ raźmierkavańni radyjočastotnaha śpiektra vyklikali rezkuju krytyku z boku SpaceX. Kampanija papiaredziła, što hety krok moža pryvieści da paharšeńnia jakaści suviazi va Ukrainie, dzie servis Starlink adyhryvaje klučavuju rolu ŭ zabieśpiačeńni suviaźziu jak hramadzianskaha nasielnictva, tak i ŭzbrojenych sił.
Jeŭrakamisija prapanavała zareziervavać dla jeŭrapiejskich kampanij častku dyjapazonu častot, jaki dazvalaje smartfonam niepasredna padklučacca da spadarožnikaŭ. Heta abmiažuje dostup da častot dla kitajskich i amierykanskich kampanij. U svaju čarhu, Jeŭraparłamient unios prapanovy, nakiravanyja na pavyšeńnie barjeraŭ dla dostupu niejeŭrapiejskich kampanij da stratehičnych radyjočastot.
Pałasu častot 2 HHc buduć raźmiarkoŭvać u 2027 hodzie.
U miežach inicyjatyvy Jeŭrakamisii Deutsche Telekom, Orange, Vodafone i Telefónica abjadnajuć namahańni, kab zabiaśpiečyć sabie dostup da hetych častot.