23‑hadovaha aficera bryhady śpiecnaza asudzili na 19 hadoŭ za «zdradu dziaržavie»
U Minskim abłasnym sudzie za «zdradu dziaržavie» (č. 2 art. 356 Kryminalnaha kodeksa) asudzili 23‑hadovaha aficera z Babrujska Jaŭhiena Žarykava. Mužčynu pryznačyli 19 hadoŭ kałonii va ŭmovach uzmocnienaha režymu, a taksama štraf 500 bazavych adzinak (22 500 rubloŭ).
Sprava razhladałasia ŭ zakrytym režymie, tamu padrabiaznaści abvinavačvańnia nieviadomyja. Prysud byŭ vyniesieny jašče ŭ mai, ale pravaabaroncam «Viasny» pra jaho stała viadoma tolki ciapier.
Jaŭhien Žarykaŭ rodam z Babrujska. Paśla zakančeńnia vajskovaj navučalnaj ustanovy jon prachodziŭ słužbu ŭ Marjinaj Horcy, dzie dysłakujecca piataja asobnaja bryhada śpiecnaza. Što stała pryčynaj jaho zatrymańnia — nieviadoma.
Pravaabaroncy «Viasny» daznalisia, što supracoŭniki KDB zatrymali Jaŭhiena Žarykava jašče ŭ lutym 2025 hoda, ale sud nad im adbyŭsia tolki ŭ mai 2026 hoda. U vieraśni mužčynu adpravili adbyvać termin u kałoniju. Ale jaho aktualnaje miescaznachodžańnie vyśviatlajecca.