Sieviaryniec robić poŭnuju pierazahruzku BCHD: z prazrystymi vybarami i prymireńniem. Chto budzie ŭdzielničać, a chto nie?
Užo 24 kastryčnika ŭ Biełastoku adbudziecca źjezd Biełaruskaj Chryścijanskaj Demakratyi, prymierkavany da 100‑hodździa partyi. Na im, siarod inšaha, projduć vybary novaha staršyni chryścijanskich demakrataŭ.
«Heta buduć sapraŭdnyja demakratyčnyja vybary, dzieja, ad jakoj biełarusy advykli. Z tajemnym hałasavańniem, prazrystaj skryniaj, — paabiacaŭ sustaršynia partyi Pavieł Sieviaryniec. — Na pasadu staršyni i namieśnikaŭ možna budzie prapanavać luboha čałavieka».
Pavieł Sieviaryniec. Fota: «Naša Niva»
Palityk taksama prymie ŭdzieł u vybarach na ahulnych padstavach. Ahulnaj ža zadačaj źjezda palityk bačyć adnaŭleńnie BCHD jak masavaj palityčnaj siły. I padkreślivaje: niahledziačy na toje, što ludzi vymušanyja pracavać u emihracyi, jany bačać svajoj metaj nie tolki pracu dziela dyjaspar, ale i na padrychtoŭku viartańnia biełarusaŭ na radzimu.
Apošnija hady BCHD isnavała ŭ stanie padzielenaści i kanfliktaŭ — adnu častku koŭdry na siabie ciahnuŭ Hieorhij Dźmitruk, druhuju — Vital Rymašeŭski. Adbilisia na ahulnym imidžy i skandały z vyjaŭleńniem siarod šerahaŭ partyjcaŭ ahientaŭ KDB.
«Kali ja vyjšaŭ z turmy, to pabačyŭ, što Chryścijanskaja Demakratyja padzielenaja, prapanavaŭ jadnacca. Spačatku heta było ŭspryniata ŭ štyki, nichto nie chacieŭ navat siadać za adzin stoł. Ale, dziakuj Bohu, udałosia pravieści šerah sustreč, dzie ŭsio ž papiarednija damovy byli dasiahnutyja. My stvaryli arhkamitet, pravodzili štotydzień sustrečy i narady i ŭrešcie pryjšli da taho, što damovilisia bolšaściu», — prakamientavaŭ Pavieł Sieviaryniec.
Užo viadoma, što na źjeździe, prynamsi, čakajecca prysutnaść partyjcaŭ Hieorhija Dźmitruka, Anatola Michnaŭca, Valeryja Mackieviča, Taisii Kabančuk, Siarhieja Vieramiejenki i inšych.
Prysutnaść Vitala Rymašeŭskaha i dalejšaja jaho rola ŭ šerahach BCHD pakul zastajecca intryhaj.
Ahułam na mierapryjemstva pryjedzie bolš za 100 delehataŭ, biełaruskich palitykaŭ roznych płyniaŭ — pradstaŭnikoŭ AHP, BNF, Ruchu za svabodu, «Volnaja Biełaruś» i inšych.
Hieahrafična jubilejny źjezd projdzie ŭ Biełastoku. Jon prymierkavany da 100‑hodździa histaryčnaj BCHD: mienavita 24 kastryčnika 1926 hoda ŭ Vilni adbyŭsia źjezd biełaruskich chryścijanskich demakrataŭ, na jakim Biełaruskaja chryścijanskaja złučnaść, što isnavała z 1917 hoda, była pierafarmatavanaja ŭ Biełaruskuju chryścijanskuju demakratyju.