Kinafiestyval «Paŭnočnaje źziańnie» sioleta projdzie ŭ farmacie kinaŭikendu ŭ Varšavie
Sioleta kinafiestyval «Paŭnočnaje źziańnie» projdzie ŭ skaročanym farmacie — jak mini-fest «Źzia weekend». Jon adbudziecca z 11 da 13 śniežnia 2026 hoda ŭ varšaŭskim kinateatry Kinoteka. Usie pakazy buduć prachodzić tolki afłajn, piša Reform.news.
Arhanizatary vyrašyli źmianić farmat praź finansavyja ciažkaści, ź jakimi sutykajucca biełaruskija kulturnyja prajekty ŭ vyhnańni, a taksama ź mierkavańniaŭ biaśpieki. Paśla taho jak biełaruskija ŭłady pryznali fiestyval «ekstremisckim farmavańniem», kamandzie daviałosia šukać biaśpiečnyja sposaby kamunikacyi ź biełaruskaj aŭdytoryjaj. Tamu sioleta asnoŭnaja ŭvaha budzie nadadzienaja hledačam za miežami Biełarusi.
Na pracu nad prajektam paŭpłyvali i asabistyja abstaviny zasnavalnicy i dyrektarki fiestyvalu Voli Čajkoŭskaj. Paŭtara hoda tamu jana stała mamaj, tamu ciapier značnuju častku jaje sił zajmaje maciarynstva.
Niahledziačy na skaračeńnie prahramy, arhanizatary majuć namier zachavać tradycyju fiestyvalu, pakazvać kino paŭnočnych i bałtyjskich krain i stvarać prastoru dla svabodnaha dyjałohu.
Padčas «Źzia weekend» hledačam pakažuć vybranyja fiestyvalnyja filmy. Padrabiaznaści prahramy i infarmacyju pra kvitki arhanizatary abiacajuć apublikavać paźniej u sacyjalnych sietkach. Padtrymać praviadzieńnie fiestyvalu možna taksama hrašovymi achviaravańniami.
«Paŭnočnaje źziańnie» — fiestyval kino Paŭnočnych i Bałtyjskich krain, zasnavany biełaruskaj pradziusarkaj i režysiorkaj Volaj Čajkoŭskaj u 2015 hodzie. Na praciahu mnohich hadoŭ jon zastavaŭsia adnoj z hałoŭnych kinapadziej dla biełarusaŭ, znajomiačy hledačoŭ z sučasnymi mastackimi i dakumientalnymi filmami Paŭnočnaj Jeŭropy i Bałtyi, a taksama z pracami niezaležnych biełaruskich kiniematahrafistaŭ.
Čytajcie taksama:
«Situacyja jak na akupavanych terytoryjach Ukrainy». Pavieł Barkoŭski — pra stan biełaruskaj kultury
Film biełarusa Jaŭhiena Łytkina zdabyŭ Śpiecyjalny pryz žury na kinafiestyvali ŭ Iardanii