Ruch na płoščy Banhałor u Minsku źmienicca. Novaŭviadzieńni hłabalnyja
Jakija źmieny płanujucca?
Fota: Minsk-naviny
Chutka na płoščy Banhałor kardynalna źmienicca schiema darožnaha ruchu. Ciapier u centry koła pracuje ciažkaja technika, a nieŭzabavie tam prybiaruć prajezd pa kruzie i pavarot z vulicy Surhanava naprava, piša Onliner.by sa spasyłkaj na «Minski kurjer».
Na płoščy Banhałor u pierśpiektyvie adkryjecca stancyja mietro «Park Družby narodaŭ», tamu ŭ tym rajonie ŭžo doŭha kipiać raboty, pierakładvajucca inžyniernyja sietki. U suviazi z hetym schiema ruchu znoŭ pierakrojvajecca
— Źmieny ŭ arhanizacyi darožnaha ruchu na płoščy Banhałor płanujem uvieści ŭ kancy listapada — pačatku śniežnia 2026 hoda, — raskazaŭ kiraŭnik prajekta i namieśnik hałoŭnaha inžyniera pradpryjemstva «Minskmietrabud» Siarhiej Hrečkin. — Adrazu paśla hetaha staniem uzvodzić płatformavy ŭčastak i druhi viestybiul budučaj stancyi. Siońnia na samym kruzie mancirujuć kanstrukcyi pieršaha viestybiula, a ŭnutry raźviazki idzie ŭładkavańnie konturu stancyi mietadam «ściana ŭ hruncie» i hidraizalacyja. U bok vulicy Niakrasava budujucca abarotnyja tupiki — takija raboty raźličvajem zaviaršyć u pačatku 2027-ha. Inšych bujnych źmienaŭ dla transpartu i piešachodaŭ na vulicy M. Bahdanoviča pakul nie płanujecca.
Zhodna z novaj schiemaj, kłasičnaha kruha bolš nie budzie. Abjazny šlach z boku Arłoŭskaj užo padrychtavany: śpiecyjalisty pakłali śviežy asfalt, nanieśli raźmietku, abaznačyli novy rehulavany pierachod i abstalavali prypynak u kirunku vulicy Niakrasava.
Schiemy ruchu pa pałosach pierabudavali:
- kali jechać z boku Niakrasava, z krajniaj pravaj pałasy možna budzie paviarnuć na Arłoŭskuju, a z troch astatnich — ruchacca tolki prama. Dalej, na vyhinie darohi, try pałasy nakirujuć transpart da vulicy Kulman i jašče try — u bok Surhanava;
- pry ruchu pa vulicy M. Bahdanoviča z boku Kulman paviarnuć naprava na Surhanava dazvolać tolki ź pieršaj pałasy, try inšyja viaduć vyklučna prama. Adrazu za skryžavańniem daroha pašyrycca: pa try pałasy pojduć u bok Niakrasava i Arłoŭskaj;
- z Surhanava aŭtamabilisty pavinny buduć spačatku syści naleva, a zatym atrymajuć mahčymaść z troch pałos pavaročvać naprava ŭ kirunku Niakrasava, a ź dźviuch astatnich — syści naleva da Kulman.
Jak adznačajecca ŭ paviedamleńni, pasažyram hramadskaha transpartu taksama varta zahadzia vyvučyć schiemu: prypynki «Płošča Banhałor» na Surhanava ŭ abodvuch kirunkach źmiaścili ŭ bok vulicy Kujbyšava. Ale na Arłoŭskaj (pry ruchu da Ł. Karastajanavaj) prypynačny punkt zastaniecca na zvykłym miescy. U rajonie skryžavańnia vulic M. Bahdanoviča i Surhanava, z boku doma №102 na M. Bahdanoviča, zapracuje novy rehulavany pierachod u kirunku vulicy Niakrasava.
Za im piešachodnaja darožka pojdzie ŭzdoŭž budaŭničaj placoŭki da novaha prypynačnaha punkta, jaki zamienić toj, što ciapier raźmiaščajecca bližej da doma №88 na Surhanava. Tam ža, bližej da Arłoŭskaj, pabudavany novy rehulavany pierachod. Pierajści darohu praz M. Bahdanoviča ad doma №88 u kirunku Arłoŭskaj užo nie atrymajecca, pakolki ŭ hetym miescy razhorniecca budaŭničaja placoŭka, miesca vytvorčaści rabot budzie aharodžana. A voś piešachodnyja šlachi ŭzdoŭž hetaha doma ŭ kirunku Niakrasava zachavajucca.
Ci vierniecca Banhałor da zvykłaha vyhladu paśla adkryćcia treciaj vietki mietro, pakul nieviadoma, padkreślivajuć u publikacyi. U pierśpiektyvie na płoščy, a taksama na vulicy Surhanava razhornucca novyja budaŭničyja placoŭki — dla čaćviortaj linii padziemki.