Premjer Brytanii zajaviŭ, što nie suprać viartańnia svabody pieramiaščeńnia pamiž Brytanijaj i ES
Brytanski premjer Endzi Biornem hatovy abmiarkoŭvać viartańnie prava brytancaŭ svabodna žyć i pracavać u krainach Jeŭrasajuza, a hramadzian ES — u Brytanii. Biornem zaklikaŭ da «sumlennaj dyskusii» pra svabodu pieramiaščeńnia, piša VVS.
Endzi Biornem. Fota: AP Photo / Kirsty Wigglesworth
Premjer choča vybudavać novyja adnosiny z Brusielem i nie vyklučaje ni viartańnia na adziny jeŭrapiejski rynak, ni adnaŭleńnia paŭnavartasnaha členstva ŭ ES.
«Ja dumaju, što patrebnyja debaty pra heta, ale zasnavanyja na faktach i dokazach», — skazaŭ Biornem.
Svaboda pieramiaščeńnia aznačaje, što hramadzianie krain-udzielnic mohuć pierajazdžać u inšyja krainy hetaha abjadnańnia, žyć i pracavać tam biez asobnaha imihracyjnaha dazvołu. Takoje ŭzajemnaje prava było ŭ brytancaŭ i hramadzian ES da breksitu. Jaho adnaŭleńnie było b umovaj viartańnia Brytanii jak u Jeŭrasajuz, tak i na adziny rynak.
Pakul Biornem havoryć vyklučna pra abmierkavańnie mahčymaściaŭ.
Pazicyja premjera adroźnivajecca ad prahramy, ź jakoj lejbarysty pieramahli na vybarach 2024 hoda. Jana vyklučała viartańnie svabody pieramiaščeńnia, dałučeńnie da adzinaha rynku i mytnaha sajuza ź ES. Raniej Biornem zajaŭlaŭ, što padtrymlivaje hetuju prahramu.
Imihracyja była hałoŭnaj pryčynaj niezadavolenaści 52% brytanskich vybarščykaŭ, jakija ŭ 2016 hodzie prahałasavali za vychad ź ES. Adnak u pačatku 2020‑ch hadoŭ, užo paśla breksitu, uzrovień imihracyi staŭ jašče vyšejšym. U 2025 hodzie, pavodle źviestak Biuro nacyjanalnaj statystyki, prytok imihrantaŭ rezka skaraciŭsia.
«Ja dumaju, što nam patrebnaja sumlennaja dyskusija pra heta», — skazaŭ Biornem, adznačyŭšy, što mihracyjnaja situacyja źmianiłasia.
Pravyja apazicyjnyja partyi raskrytykavali jaho słovy. «Brytanski narod prahałasavaŭ za toje, kab pakončyć sa svabodaj pieramiaščeńnia, i viartańnia da jaje być nie moža», — zajaviŭ Krys Fiłp, jaki adkazvaje za ŭnutranyja spravy ŭ cieniavym kabiniecie kansiervataraŭ.
Lidar Reform UK Najdžeł Faradž nazvaŭ słovy premjera «absalutnaj zdradaj breksitu i jaho abiacańniam vybarščykam Mejkierfiłda».
Apošnija sacyjałahičnyja apytańni pakazvajuć, što vidavočnaja bolšaść brytancaŭ niezadavolenaja breksitam i hipatetyčna chacieła b viarnucca ŭ ES. Zvyčajna heta tłumačać tym, što značnuju dolu tych, chto hałasavaŭ za vychad ź ES u 2016 hodzie, składali vybarščyki starejšaha ŭzrostu, mnohija ź jakich z taho času pamierli. Adnak źviestki śviedčać i pra toje, što prykmietnaja častka prychilnikaŭ breksitu źmianiła svaju pazicyju za minułyja 10 hadoŭ.