Hiermanija kupić sabie ŭkrainskija kryłatyja rakiety «Bars»

Hiermanija płanuje zakupić raspracavanyja va Ukrainie kryłatyja rakiety «Bars». Pra heta paviedamlaje Financial Times sa spasyłkaj na krynicy, znajomyja z płanami niamieckich uładaŭ. Čakajecca, što pahadnieńnie ab nabyćci pieršaj partyi budzie zaklučana ŭ najbližejšyja tydni.

Fota: vecteezy.com

U pačatku 2027 hoda niamieckija vajskoŭcy źbirajucca pravieści techničnyja vyprabavańni rakiet. Kali jany projduć paśpiachova, Hiermanija moža zakazać niekalki socień adzinak. Pavodle infarmacyi Financial Times, heta stanie pieršaj viadomaj zakupkaj Hiermanijaj nastupalnaha ŭzbrajeńnia, raspracavanaha va Ukrainie.

Raspracoŭka «Barsa» pačałasia ŭ 2023 hodzie. Farmalna vyrab kłasifikujecca jak bieśpiłotny latalny aparat, adnak jaho stvaralniki nazyvajuć jaho kryłataj rakietaj. Pavodle ich źviestak, dalokaść palotu dasiahaje 1000 kiłamietraŭ, chutkaść pieravyšaje 700 kiłamietraŭ za hadzinu, a masa bajavoj častki składaje amal 60 kiłahramaŭ.

Pry raspracoŭcy i vytvorčaści vykarystoŭvajucca technałohii štučnaha intelektu, u tym liku mašynny zrok dla naviadzieńnia na cel.

«Bars» taksama ŭžyvajecca dla pierachopu rasijskich pavietranych celaŭ. Prezident Ukrainy Uładzimir Zialenski paviedamlaŭ, što efiektyŭnaść takich pierachopaŭ składaje kala 30%. 

Jak paviedamiła Bi-bi-si ŭkrainskaja krynica, rakietu raspracoŭvaje pryvatnaja kampanija, jakaja niadaŭna stvaryła sumiesnaje pradpryjemstva ŭ Hiermanii. Jano pracuje ŭ miežach prahramy Build with Ukraine, jakuju finansuje Bierlin.

Pieršapačatkova prahrama praduhledžvała vytvorčaść ukrainskaha ŭzbrajeńnia za miežami krainy, kab pašyryć vytvorčyja mahutnaści i źnizić ryzyku rasijskich udaraŭ. U pierśpiektyvie jana taksama pavinna zabiaśpiečyć ukrainskim vytvorcam dostup da rynkaŭ krain NATA.

Pieršaja partyja rakiet, vyrablenych sumiesnym pradpryjemstvam, pastupiła va Uzbrojenyja siły Ukrainy ŭ kastryčniku 2026 hoda. Raniej Zialenski zajaŭlaŭ pra płany atrymać 2000 takich rakiet.

Kamientary da artykuła