Kruhaśvietny kruiz spyniŭsia z-za koštaŭ na paliva. Pasažyraŭ vysadžvajuć u Kambodžy
Pa słovach apieratara, u niekatorych rehijonach Azii vydatki na paliva ŭ raźliku na adnu kajutu pavialičylisia z 1800 da 8000 dalaraŭ u miesiac.
Kruizny łajnier Villa Vie Odyssey pierapyniŭ kruhaśvietnaje padarožža z-za nadzvyčaj vysokich vydatkaŭ na paliva. Pasažyraŭ vysadžvajuć u Kambodžy, piša Bi-bi-si.
Amierykanski apieratar sudna paviedamiŭ, što ciapier zajmajecca pytańniami vysadki pasažyraŭ i arhanizacyjaj ich «časovaha raźmiaščeńnia». Kolki ich, nie ŭdakładniajecca, maksimalnaja ŭmiaščalnaść prykładna 200‑mietrovaha sudna — da 650 pasažyraŭ. Pa najaŭnych danych, na borcie znachodziłasia kala 200 pasažyraŭ. Im pradpisana syści na bierah u kambadžyjskim partovym horadzie Sianukvil.
U kastryčniku 2024 hoda łajnier adpraviŭsia ź Biełfasta ŭ «bieśpierapynnaje kruhaśvietnaje padarožža». Z tych časoŭ z-za vajny ZŠA i Izraila suprać Irana suśvietnyja ceny na paliva rezka vyraśli. Pa słovach apieratara, u niekatorych rehijonach Azii vydatki na paliva ŭ raźliku na adnu kajutu pavialičylisia z 1800 da 8000 dalaraŭ u miesiac.
Kampanija zajaviła, što pryniała «značnyja miery dla skaračeńnia raschodu paliva, u tym liku za košt źnižeńnia chutkaści ruchu i pavieličeńnia času stajanki ŭ partach». Adnak hetych mier akazałasia niedastatkova, kab «kampiensavać nadzvyčajny rost vydatkaŭ na paliva».
«Pierakładać uvieś ciažar hetaha padaražeńnia na plečy pasažyraŭ — nierealistyčnaje rašeńnie», — adznačyli ŭ kampanii.
U bližejšyja 60 dzion kampanija płanuje zaniacca «restrukturyzacyjaj i rekapitalizacyjaj», choć, jak pryznajuć u kiraŭnictvie, «pośpiech hetych mierapryjemstvaŭ nie harantavany».
Zhodna ź infarmacyjaj na sajcie, kruhaśvietnaje padarožža Villa Vie Odyssey pavinna było praciahnucca try z pałovaj hady i achapić amal 150 krain. Adpraŭleńnie nieadnarazova adkładałasia z-za ramontnych rabot; u vyniku pasažyry na niekalki miesiacaŭ «zatrymalisia» ŭ Biełfaście, a kampanija ŭžo tady paniesła šmatmiljonnyja straty. Da hetaha aŭtorka, kali było abvieščana ab prypynieńni kruhaśvietnaha padarožža, kruiz doŭžyŭsia ŭžo bolš za 750 dzion.
«Takoha pavarotu ja dakładna nie čakała — nijak nie mierkavała, što praviadu tut stolki času, — raskazała Bi-bi-si adna z pasažyrak, Choli Chienesi. — Nas usich pasialili ŭ roznyja hateli, u tym hateli, dzie žyvu ja, jość jašče niekalki čałaviek z łajniera. My prosta čakajem».
Choli Chienesi i jaje kot Kapitan pakul zastajucca ŭ Kambodžy
Zhodna ź infarmacyjaj na sajcie, na borcie sudna Villa Vie Odyssey jość niekalki baraŭ i restaranaŭ, pałuba z basiejnam i placoŭka dla hulni ŭ pikłboł.
Košt pastajannaha pražyvańnia ŭ kajutach varjirujecca ad 120 000 da 440 000 dalaraŭ. Kajuty taksama možna arandavać — cana pačynajecca ad 3500 dalaraŭ u miesiac.
Letaś kampanija zapuściła prahramu pažyćciovaha pražyvańnia, jakaja dazvalaje pravieści ŭ mory hady paśla vychadu na piensiju.
U 2024 hodzie, praź niekalki dzion paśla taho, jak Donald Tramp atrymaŭ pieramohu na vybarach i zabiaśpiečyŭ sabie druhi prezidencki termin, kampanija Villa Vie Residences anansavała čatyrochhadovy pakiet pasłuh pad nazvaj «Skip Forward» («Prapuścić»). U toj čas hienieralny dyrektar kampanii zajaviŭ u intervju telekanału Fox Business, što heta «idealny pradukt dla tych, chto abiacaŭ pakinuć krainu ŭ vypadku pieramohi peŭnaha kandydata na vybarach».
Pa słovach Choli Chienesi, raniej žycharam sudna prapanavali apłacić paliŭny zbor z-za rezkaha rostu suśvietnych cen na haručaje, a maršrut ich padarožža byŭ «istotna skaročany». Niekatoryja pasažyry vyrašyli syści na bierah i praciahnuć padarožža pa sušy.
Adnak inšyja — u tym liku i Chienesi — vyrašyli zastacca ŭ Kambodžy ŭ nadziei, što łajnier Villa Vie Odyssey nieŭzabavie znoŭ adpravicca ŭ šlach.
«Pakul nam aficyjna nie abvieściać, što ŭsio skončana — kančatkova i biespavarotna, — ja nie zdamsia. Ja bolš nidzie nie zmahu vieści taki ład žyćcia. Viarnucca dadomu? Heta było b tak banalna, — kaža jana. — Urešcie, Kambodža — nie samaje horšaje miesca, kab tam patusavacca».