Makiej raspuściŭ kansultacyjnuju Radu pry Administracyi, kab nie hańbić jaje siabroŭ

Pryčyna — «abvinavačvańni ŭ padkantrolnaści ŭładam».

Siońnia siabry hramadska-kansultacyjnaj Rady pra Administracyi prezidenta atrymali list ab skasavańni hetaj struktury. List pryjšoŭ za podpisam kiraŭnika Administracyi Uładzimira Makieja.

«Analizujučy situacyju, što skłałasia ŭ apošni čas vakoł Rady, baču, što jaje praca nie moža być pa-sapraŭdnamu plonnaj u atmaśfiery abvinavačvańniaŭ u tym, što hetaja struktura całkam padkantrolnaja ŭładzie, što siabry Rady — heta pryznačency Administracyi prezidenta i hetak dalej», — napisaŭ Makiej.

«Udzielniki dziejnaści HKR zaznajuć niezasłužanaje šalmavańnie z boku ŭnutranych i źniešnich apanientaŭ ščyraha dyjałoha. Vy sami havaryli mnie pra toje, što vas abvinavačvajuć u «supracoŭnictvie z ŭładami». Absalutna nie chaciełasia b, kab dziejnaść HKR nanosiła ŭron reputacyi kožnaha z vas, viała da raskołu hramadzianskaj supolnaści ŭ Biełarusi», — zaznačajecca ŭ liście.

Siabra Rady, žurnalist Piatro Marcaŭ kaža: «Ad pačatku było zrazumieła, što Rada nie budzie efiektyŭnaj. Kali jana nie karystajecca davieram, to, vidać, i nie patrebnaja. Uładam jana taksama nie nadta treba, bo jany i tak davoli samadastatkovyja».

Hramadska-kansultacyjnaja Rada pry Administracyi prezidenta stvoranaja ŭ pačatku 2009. Metaj było abmierkavańnie «aktualnych pytańniaŭ raźvicca dziaržavy i hramadstva, vypracoŭka prapanovaŭ pa bolš aktyŭnamu ŭciahvańniu Biełarusi ŭ suśvietnyja pracesy, udaskanalvańnie nakirunkaŭ sacyjalna-ekanamičnaha i palityčnaha raźvićcia krainy».

Kamientary da artykuła