Chočacie — viercie, chočacie — nie. VUP vyras na 7%

Vałavy ŭnutrany pradukt Biełarusi za studzień-kastryčnik vyras na 7% u paraŭnańni z anałahičnym pieryjadam minułaha hoda i skłaŭ 216,8 trłn. rubloŭ, paviedamiła pres-słužba Nacyjanalnaha statystyčnaha kamiteta.

Heta dynamika nižejšaja za hadavyja prahnoznyja pakazčyki. Zhodna z prahnozam sacyjalna-ekanamičnaha raźvićcia ŭ 2011 hodzie pryrost VUP pavinien skłaści da adpaviednaha ŭzroŭniu 2010 hoda 9–10%.

Vytvorčaść pramysłovaj pradukcyi za dziesiać miesiacaŭ uzrasła na 10% i skłała 245 trłn rubloŭ (hadavy prahnoz rostu — na 9–9,5%). Udzielnaja vaha adhružanaj inavacyjnaj pradukcyi ŭ ahulnym abjomie adhružanaj pradukcyi skłała 17,1%, što vyšej za hadavy prahnozny pakazčyk — 12–13%.

Abjom sielskahaspadarčaj vytvorčaści ŭ haspadarkach usich katehoryj vyras na 6,1% (prahnoz na hod — rost na 7–8%), pry hetym u sielhasarhanizacyjach vytvorčaść pavialičyłasia na 8,7%.

Pryrost inviestycyj u asnoŭny kapitał skłaŭ 14,3% (hadavy prahnoz — 16–17%). Uviedziena ŭ ekspłuatacyju 4 młn. 235,4 tys. kv. mietraŭ žylla (na 17,8% mienš za letašni pakazčyk).

Abjom pieravozki hruzaŭ transpartam uzros na 6,1%, roźničny tavaraabarot — na 9,2%.

Spažyvieckija ceny vyraśli ŭ kastryčniku 2011 hoda na 8,2% da vieraśnia i na 88,7% — da śniežnia 2010 hoda. Ceny vytvorcaŭ pramysłovaj pradukcyi ŭ kastryčniku da vieraśnia pavialičylisia na 14,4%, da śniežnia 2010 hoda — na 108,9%.

Kamientary da artykuła