Niezvyčajnaja Hanna Atajan

29.01.2012 / 00:58

Adkryćcio vystavy lvoŭskaj mastački ŭ Minsku — 31 studzienia, a 17-j. Muziej sučasnaha mastactva (Niezaležnaści, 47).

31 studzienia u vialikaj zale Muzieja sučasnaha vyjaŭlenčaha mastactva adbudziecca adkryćcio vystavy tvoraŭ Hanny Atajan (Lvoŭ, Ukraina) «Atrybuty».

"Viartańnie".

"Ekipaž".

"Pryviet z mora".

"Śviatočny naciurmort".

"Lubimy pinžak".

"Anhličanka".

"Atrybut".

«Śviet, staranna stvorany lvoŭskaj mastačkaj Hannaj Atajan, zapaminaješ ź pieršaha pozirku

i paźniej biespamyłkova paznaješ u strakataści luboj vystavy, — piša mastactvaznaŭca Natalla Kasmalinskaja. — Nie tolki z-zapaciešna-iranična-trahikamičnych hierojaŭ i miełanchalična-vytančanaha batykavaha kałarytu. A ŭ pieršuju čarhu — z-za dziŭnaj dakładnaści, ź jakoj mastačka „traplaje ŭ dziasiatku“ psichałahičnaha partreta kožnaha svajho piersanaža i siužeta.

Z dapamohaj dvuch-troch detalaŭ joj udajecca „raspavieści“ cełaje žyćcio.

Usie hetyja miedytujučyja naciurmorty z hranatami i karalami, kranalnyja fildepiersavyja pančochi, „rohi bahaćcia“ z manijaj vieličy, dušeŭnyja chaładzilniki, dziŭnyja vazy dla sadaviny čamuści z harnistami zamiest nimf i najad, zakłapočana-seksualnyjaanioły-rusałki z tvaram Frydy Kała, kalekcyja ašałamlalnych pinžakoŭ i inš… usio tak vyrazna i dakładna, usio tak „smačna znojdziena“, što my tut ža vydajom aŭtaru bieźlimitny kredyt davieru.

Akvarelnaja faktura razmaloŭki pa šoŭku idealna supadaje ź idejaj mastački: razmyć miažu pamiž realnym śvietam i tvorčaj fantazijaj. Udałaja stylizacyja pad najblizkaje da nas retra 1930-ch nadaje tvoram Atajan liryčnuju intymnaść paštoŭki ź siamiejnaha albomu.

U toj ža čas iraničnaja hipierbalizacyja dazvalaje joj paźbiehnuć banalnaści realizma, ale utrymlivać realnaść u ramkach vyznačanaj umoŭnaści času i prastory taho, što adbyłosia.

Dziakujučy biespamyłkovamu adčuvańniu i talentu bačyć „vialikaje ŭ małym“ Hanna znachodzić mienavita toj najbolš charakterny akcent, toj pierakanaŭčy nabor atrybutaŭ, mienavita tuju dakładnuju tanalnaść, jakija dazvalajuć uznavić „za kadram“ kožnaha asobnaha tvora peŭny partret epochi».

Hanna Atajan naradziłasia ŭ Lvovie ŭ 1967-m, skončyła Lvoŭskuju Akademiju mastactvaŭ. Pracuje ŭ technicy žyvapisu pa šoŭku i haračym batyku. Jaje pracy znachodziacca ŭ pryvatnych kalekcyjach Ukrainy i za miažoj.

Vystava praciahniecca da 11 lutaha.

Čytajcie taksama:

Kamientary da artykuła