Milicyjanta, što nie ŭziaŭ adbitki palcaŭ u Kanavałava, asudzili na try hady

Rusłan Sinicyn raniej zajmaŭsia «telefonnymi terarystami». Sud nad milicyjantam pravodzili ŭ zakrytym režymie, spasłaŭšysia na dziaržaŭnyja sakrety, jakija nibyta ŭtrymlivajucca ŭ materyjałach spravy.

U svoj čas Rusłan Sinicyn (na fota — źleva) zajmaŭsia «telefonnymi terarystami».

U Viciebskim abłasnym sudzie paviedamili, što supracoŭnik UUS abłvykankama Rusłan Sinicyn pryznany vinavatym u słužbovaj chałatnaści.

Sinicyn taksama pazbaŭleny prava zajmać pasady, źviazanyja z prachodžańniem słužby ŭ orhanach unutranych spraŭ, terminam na 5 hadoŭ i prava zajmacca ekśpiertna-kryminalistyčnaj dziejnaściu terminam na 5 hadoŭ.

Nahadajem, kryminalnaja sprava ŭ adnosinach da Sinicyna była zaviedziena pa art. 428 KK («Słužbovaja chałatnaść»). Milicyjant nie ŭziaŭ u 2009 adbitki palcaŭ u pryzyŭnika Dźmitryja Kanavałava, jakoha letaś pryznali vinavatym u ździajśnieńni vybuchaŭ u Minsku i Viciebsku.

Ekśpiert nie tolki nie pravioŭ daktyłaskapiju, ale i vydaŭ maładomu čałavieku daviedku ab tym, što toj prajšoŭ takuju praceduru raniej.

Zhodna z materyjałami kryminalnaj spravy, mienavita adbitki palcaŭ Dźmitryja Kanavałava byli vyjaŭleny na vybuchovym prystasavańni, jakoje nie spracavała ŭ 2008-m.

Zhodna z art. 428 KK Rusłanu Sinicynu pahražała pakarańnie ŭ vyhladzie abmiežavańnia albo pazbaŭleńnia voli na termin da piaci hadoŭ z pazbaŭleńniem prava zajmać peŭnyja pasady.

Sud nad milicyjantam pravodzili ŭ zakrytym režymie, spasłaŭšysia na dziaržaŭnyja sakrety, jakija nibyta ŭtrymlivajucca ŭ materyjałach spravy.

Rusłan Sinicyn — vypusknik Minskaha vyšejšaha avijacyjnaha kaledža. Da prychodu ŭ milicyju pracavaŭ u hramadzianskaj avijacyi. Pracavaŭ ekśpiertam fanaskapičnaj łabaratoryi ekśpiertna-kryminalistyčnaha centra UUS abłvykankama. Zajmaŭsia vyličeńniem «telefonnych terarystaŭ». Zatym pravodziŭ daktyłaskapiju.

Papraŭčyja kałonii-pasialeńni

U ich adbyvajuć pakarańnie asudžanyja za złačynstvy, ździejśnienyja pa nieaściarožnaści, i asudžanyja mienavita da kałonii-pasialeńnia. Siudy pieravodziać z papraŭčych kałonij tych, chto ŭpieršyniu pazbaŭleny voli i ćviorda staŭ na šlach vypraŭleńnia. U takich kałonijach bolš miakkija ŭmovy ŭtrymańnia, a taksama mienšy kompleks abmiežavańniaŭ.

Prysud ustupiŭ u siłu 27 studzienia.

Kamientary da artykuła