Łukašenka admoviŭsia pamiłavać Kavalova i Kanavałava

15.03.2012 / 10:11

«Rašeńnie pryniataje ŭ suviazi ź vialikaj kolkaściu achviar pry vybuchu ŭ minskim mietro».

Łukašenka pastanaviŭ nie prymianiać pamiłavańnia da asudžanych na śmiarotnuju karu za teraryzm Dźmitryja Kanavałava i Uładzisłava Kavalova. Paviedamleńnie ab hetym prahučała ŭ viačernim vypusku prahramy «Panarama» na telekanale «Biełaruś 1».

Takoje rašeńnie Alaksandra Łukašenki abumoŭlena «vyklučnaj niebiaśpiekaj i ciažkaściu nastupstvaŭ dla hramadstva ad učynienych złačynstvaŭ».

***

Uradžency Viciebska 26-hadovyja Dźmitryj Kanavałaŭ i Uładzisłaŭ Kavaloŭ byli zatrymanyja 12 krasavika 2011 pa padazreńni ŭ ździajśnieńni vybuchu na stancyi «Kastryčnickaja» Minskaha mietrapalitena. Adnak da pradjaŭlenych zatym abvinavačvańniaŭ u hetym terarystyčnym akcie paźniej dadalisia abvinavačvańni ŭ ździajśnieńni inšych złačynstvaŭ, u tym liku Kanavałavu — u vybuchu ŭ Minsku 4 lipienia 2008 hoda na kancercie z nahody Dnia Niezaležnaści. Kanavałaŭ pryznaŭ siabie vinavatym u ździajśnieńni dvuch teraktaŭ u Minsku, ale nie pryznaŭ siabie vinavatym u ździajśnieńni dvuch vybuchaŭ u Viciebsku ŭvosień 2005 hoda, Kavaloŭ — nie pryznaŭ siabie vinavatym u dapamahańni teraryzmu.

30 listapada 2011 Viarchoŭny sud prysudziŭ abodvuch fihurantaŭ da vyšejšaj miery pakarańnia — śmiarotnaj kary.

Jon pryznaŭ Kanavałava vinavatym u złosnym i asabliva złosnym chulihanstvie, naŭmysnym źniščeńni majomaści, niezakonnym nabyćci, zachoŭvańni, pieravozcy vybuchovych rečyvaŭ i vybuchovych pryład, teraryźmie, źviazanym z zabojstvam ludziej. Kavalova — u złosnym i asabliva złosnym chulihanstvie, naŭmysnym źniščeńni majomaści, niezakonnym nabyćci, zachoŭvańni, pieravozcy vybuchovych rečyvaŭ i vybuchovych pryład, niedaniasieńni ab padrychtoŭcy asabliva ciažkim złačynstvie, ab ździajśnieńni asabliva ciažkaha złačynstva i asoby, što jaho ździejśniła, ab miescy jaho znachodžańnia, a taksama u dapamahańni teraryzmu.

U vyniku teraktu 11 krasavika 2011 h. 15 čałaviek zahinuli, ciažkija cialesnyja paškodžańni atrymali 32, mienš ciažkija — 72, inšyja cialesnyja paškodžańni — 283 čałavieki. U vyniku vybuchu 4 lipienia 2008 hoda ŭ Minsku ranieńni atrymali 59 čałaviek, 22 vieraśnia 2005 hoda ŭ Viciebsku — 55 i 14 vieraśnia ŭ Viciebsku — dva čałavieki.

Pavodle aficyjnaj infarmacyi, Dźmitryj Kanavałaŭ admoviŭsia pisać prašeńnie ab pamiłavańni na imia prezidenta. Uładzisłaŭ Kavaloŭ prašeńnie napisaŭ.

Na praciahu troch z pałovaj miesiacaŭ maci Kavalova aktyŭna zmahałasia za svajho syna, źviartałasia da ŭładaŭ, mižnarodnych arhanizacyj.

Jana nakiravała ŭ Kamitet AAN pa pravach čałavieka skarhu ab parušeńni prava na žyćcio. Skarha była aficyjna zarehistravanaja ŭ kamitecie AAN 15 śniežnia. U adpaviednaści z pracedurnymi praviłami Kamitet AAN pa pravach čałavieka źviarnuŭsia z prośbaj da ŭładaŭ Biełarusi nie pryvodzić u vykanańnie śmiarotny prysud Kavalovu, pakul skarha nie budzie razhledžanaja pa sutnaści.

11 sakavika maci i siastra Kavalova sustrakalisia ź im u SIZA KDB.

Čytajcie taksama:

Kamientary da artykuła