14 žniŭnia staršynia Centrvybarkama Lidzija Jarmošyna dała razhornutyja intervju adrazu niekalkim dziaržaŭnym telekanałam. Raskazała pra toje, chto sioleta idzie ŭ parłamient, što jana dumaje pra apazicyjanieraŭ i čamu nie moža zrazumieć, navošta isnujuć sacsietki. Publikujem najbolš jaskravyja vykazvańni, jakija prahučali ŭ efiry ANT i kanała «Biełaruś-1».
«Ja pahadžusia ź misijaj PASE, što vybarčaja kampanija, choć u cełym spakojnaja, jana małazaŭvažnaja».
«Mižnarodnyja naziralniki pradstavili svaje vysnovy. Jany ŭ pryncypie adznačajuć dobrazyčlivaść i adkrytaść biełaruskaha boku. Jany adznačajuć, što zroblenyja peŭnyja kroki ŭ płanie palapšeńnia vybarčaha pracesu. Tym nie mienš jany nie zadavolenyja. Jany ličać niezbałansavanym skład vybarčych kamisij. U pryncypie, takoje niadrennaje, całkam vytrymanaje paviedamleńnie».
«Vybary — heta konkurs, dzie ty pavinien pakazać siabie najlepšym. A konkurs ty vyjhraješ, kali budzieš dobra siabie rekłamavać».
«Chto i navošta idzie na vybary? Jość častka ludziej, jakija chočuć źmianić palityčnuju sistemu. Jak praviła, heta pradstaŭniki apazicyjnych palityčnych partyj. Jany ličać, što kali jany pryjduć u parłamient, to źmieniać zakanadaŭstva, inicyjujuć źmieny ŭ Kanstytucyju… Jość častka ludziej, siarod ich taksama byvajuć apazicyjaniery, jakija razhladajuć parłamient jak miesca pracaŭładkavańnia. Čamu? Tamu što ŭ hetych ludziej ničoha niama, i pasada ich — partyjny funkcyjanier. Dla moładzi heta — chaču pasprabavać. Heta prykolna. Voś jamu cikava, choča daviedacca, što heta takoje. I asnoŭnaja častka — heta mocnyja haspadary, heta tyja, kaho vysunuli pracoŭnyja kalektyvy i chto razhladaje miesca ŭ parłamiencie jak čarhovuju karjernuju prystupku».
«Ci chaču ja bačyć u parłamiencie miesca dyskusij, sprečki, apazicyju? U pryncypie, parłamient dla hetaha i stvorany… U parłamiencie pavinnyja być pradstaŭlenyja roznyja palityčnyja siły. Jany pavinnyja dyskutavać, jany pavinnyja vypracoŭvać niejkuju kanstruktyŭnuju pazicyju na karyść hramadstvu».
«Apazicyja, jak zvyčajna, rychtujecca da projhryšu. A kab padrychtavacca da projhryšu, treba zhańbić reputacyju inšych. Jany hetym pastajanna zajmajucca».
«Ja nie vieru va ŭkidy biuleteniaŭ… U vybarčyja kamisii trapili najlepšyja z najlepšych. Isnuje hramadski kantrol, skryni apiačatvajucca. Nu, ja nie viedaju, što jašče… Adbitki palcaŭ zdymać?»
«U mianie aptymistyčny nastroj. Heta taki aściarožny aptymizm. Tamu što ja razumieju, što vybary — heta zaŭsiody praces u peŭnym płanie niepradkazalny. U tym płanie, što roznyja palityčnyja siły mohuć vykarystoŭvać vybary dla abvastreńnia palityčnaj situacyi».
«Zakliki, jakija hučać navat ciapier, pakazvajuć, što ŭdzielniki padziej 2010 hoda ničomu nie navučylisia navat u turmie. Jany znoŭ rychtujuć akcyi niepadparadkavańnia. Heta samaja vialikaja pahroza. Z usim inšym my spravimsia. Usio pad kantrolem».
«Z čym źviazany konkurs 5 čałaviek na miesca? Dy narod raźvivajecca, kraina raźvivajecca, demakratyja raźvivajecca. Ja nie baču ničoha dziŭnaha».
«Ci vykarystoŭvajuć kandydaty ŭ deputaty sacyjalnyja sietki i internet dla ahitacyi? Apazicyjnyja, pa-mojmu, vielmi vykarystoŭvajuć. Ale inšyja, mahčyma, u mienšaj stupieni. Davajcie nie budziem zabyvać, što tyja, chto idzie ŭ deputaty, — heta ludzi za 40. Mahčyma, navat za 50. Voś ja, naprykład, zusim nie ŭjaŭlaju, navošta patrebnyja sacyjalnyja sietki. Ja liču, što ź siabrami treba razmaŭlać, sustrakacca asabista albo praz telefon. Ja nie razumieju, jak moža razmaŭlać praź pierapisku. Jak možna chvalicca fotazdymkami pierad nieznajomymi ludźmi. Dla mianie heta niešta biessensoŭnaje, nadumanaje i pantovaje».
«Internet-placoŭki my nie adsočvajem. Ujavicie, kolki ich, heta achapić nieachopnaje. CVK karystajecca tolki niekalkimi infarmacyjnymi resursami. Samym bujnymi ŭ Respublicy Biełaruś. Kali my tam zaŭvažajem niejki nieparadak, to my reahujem».
«Kali adzin kandydat, nacyjanalna aryjentavany, kryčyć inšamu kandydatu, kamunistyčnamu, što jon kamuniaka, što jon vatnik, to jak reahavać? Z adnaho boku, heta tak, abraza. Ale jana vykazanaja nie ŭ druku, jana vykazanaja asabista. Tut ciažka ažyćciaŭlać niejkija dziejańni».
Ciapier čytajuć
Vialikaja hutarka ź Lesiaj Rudnik pra seksizm, muža-reślera, zarobak doktarki navuk u Šviecyi, apazicyju i pamyłku Jeŭrasajuza25
Kamientary