Piać faktaŭ pra zatrymanuju hałoŭnuju redaktarku TUT.by Marynu Zołatavu
Siarod zatrymanych u aŭtorak siłavikami — hałoŭnaja redaktarka partała TUT.by Maryna Zołatava.
«NN» sabrała niekalki rysak da partretu žurnalistki.
Vučyłasia na bałharskaj fiłałohii
Marynie Zołatavaj 40 hadoŭ, jana rodam ź Minska. Vučyłasia ŭ BDU na bałharskaj fiłałohii. Luboŭ da hetaj movy i krainy Maryna pieraniesła i ŭ poststudencki čas.
«Ja vielmi lublu Bałharyju. Lublu navat za toje, za što mnohija jaje nie lubiać. Dla mianie zdajecca całkam naturalnym matlać hałavoj u znak zhody i kivać, kali chočaš skazać «nie». Ja lublu rakiju, sirenie i lucienicu. A movaj mižnarodnych znosin liču bałharskuju. Jašče ja lublu śpiavać trahičnyja makiedonskija pieśni. Škada, što nichto nie lubić słuchać», — pryznavałasia jana adnojčy.
Zołatava drukavała svaje ŭražańni pra Bałharyju ŭ tym liku i ŭ «Našaj Nivie».
«Padśviadoma bałhary hatovyja da lubych źmienaŭ — los pryvučyŭ. Heta datyčyć jak hramadskaha, tak i asabistaha žyćcia. Bałhary nie vynosiać nudy i adnastajnaci. Časta jany zachaplajucca niečym, układajuć u hetuju spravu bahata času i hrošaj, a paśla kidajuć, kab addacca novamu zachapleńniu», — pisała jana.
Čatyrnaccać hadoŭ uznačalvaje TUT.by
Zołatava skončyła aśpiranturu Instytuta movaznaŭstva Akademii navuk. Pracavała ŭ dziaržaŭnym Instytucie prablem navuki, a taksama ŭ infarmacyjnym ahienctvie BiełaPAN. U 2004 hodzie Zołatava ŭznačaliła partał TUT.by. Na toj momant sajt byŭ zvyčajnym ahrehataram navinaŭ. Vystaŭlali samaje cikavaje, što pradukavałasia na inšych placoŭkach. Faktyčna, Zołatava była pieršaj, chto na TUT.by prafiesijna zaniaŭsia mienavita navinami. Čatyrnaccać hadoŭ tamu sajt mieŭ usiaho 6000 unikalnych karystalnikaŭ za sutki.
Za hety čas TUT.by staŭ samym bujnym biełaruskim ŚMI. Naviedvalnaść padniałasia bolš čym u 100 razoŭ. U kalektyvie pracuje bolš za 50 žurnalistaŭ. Adkrylisia usiemahčymyja dadatki, jak «Afiša» i «Sport» i «Łedzi.tut.baj». Na siońnia TUT.by źjaŭlajecca samym upłyvovym biełaruskim resursam, ź mierkavańniem jakoha vymušanyja ličycca i reahavać jak čynoŭniki, hetak i siłaviki.
Abaraniała «Našu Nivu»
Maryna Zołatava chadziła na pres-kanfierencyju da Alaksandra Łukašenki ŭ červieni 2011 hoda. U toj čas vostra stajała pytańnie ab zakryćci niezaležnych haziet «Naša Niva» i «Narodnaja Vola». Zołatava ŭstała na abaronu miedyja.
«U 21-y raz prosicie daravać, kolki možna? Parušyŭ zakon — adkazvaj. Moža, im vystaviać materyjalny pazoŭ, niachaj płaciać. Ja vielmi škaduju, što «Niva» stała zusim nie toj nivaj. Heta admarožanaja presa. Nielha rabić rejtynh na hory. Kali ad majho mierkavańnia niešta budzie zaležyć, to ja ŭliču i vaša mierkavańnie. Ale vy nie ŭziali pad svaju harantyju. Nie chočacie, bo nie buduć rabić. Chaj u sudzie raźbiarucca», — skazaŭ tady kiraŭnik dziaržavy. U vyniku sud pryniaŭ rašeńnie nie zakryvać niezaležnyja vydańni.
Paśla hetaha Zołatava jašče nieadnarazova chadziła na pres-kanfierencyi da Alaksandra Łukašenki. Jana była siarod traich žurnalistaŭ niedziaržaŭnych ŚMI, ź jakimi Łukašenka sustreŭsia napiaredadni prezidenckich vybaraŭ 2015 hoda. Mienavita da Maryny jon źviartaŭsia, kali naradziŭ čarhovy miem: «Navošta z mužam doma pić piva?» Hetaje videa na jutubie pahladzieli 271 tysiaču razoŭ.
Maci dvaich dziaciej
U Maryny jość dačka Nadzieja, jakaja pierajšła ŭ dziaviaty kłas himnazii i syn Fiodar, jaki ad vieraśnia budzie vučycca ŭ šostym kłasie. Dačka zajmajecca mastackaj himnastykaj.
«Dačka praviała davoli šmat času ŭ mianie na kaleniach, nazirajučy za tym, jak ja «staŭlu naviny». A Fiodar «stavić naviny» mnie nie davaŭ, a addaje pieravahu heta rabić sam», — pisała Zołatava.
Siarod svaich lubimych knih jana nazyvaje «Sotnikava» Vasila Bykava, «U vajny nie žanočaje abličča» Śviatłany Aleksijevič, «Vosień patryjarcha» Markiesa, «Chazarski słoŭnik» Paviča.
Zachaplajecca bieham i płavańniem
Apošnija hady Maryna aktyŭna zachaplajecca bieham. Nieadnojčy prabiahała paŭmarafon. U fejsbuku jana pryznavałasia, što nie zrabiła b hetaha biez padtrymki muža. Taksama Zołatava maje pieršy razrad pa płavańniu. Amal dziesiać hadoŭ addała hetamu vidu sportu. Ź ciepłynioj zhadvaje svajho nastaŭnika — zasłužanaha treniera Biełarusi Mikałaja Mitryčenku, jaki nie tolki vučyŭ chutka płavać, ale i vadziŭ svaich vychavancaŭ u muziei.
Ciapier čytajuć
Novy staršynia Kanstytucyjnaha suda adpraviŭ syna vučycca na raźviedčyka ŭ akademiju HRU. A jak pačałasia vajna, chutčej zabraŭ z Rasii20
Kamientary