Film «Horad chłuśni», adnu z hałoŭnych rolaŭ u jakim syhraŭ Džoni Dep, źniali z prakatu ŭ ZŠA. ŚMI źviazvajuć rašeńnie z prablemnaj reputacyjaj akciora.
«Horad chłuśni» - brytanska-amierykanskaja stužka režysiora Breda Furmana. Film pryśviečany historyi rasśledavańnia zabojstva viadomych repieraŭ Tupaka Šakura i Krystafiera Džordža Uolesa, viadomaha jak The Notorious B.I.G.
Płanavałasia, što premjera «Harady chłuśni» u ZŠA adbudziecca 7 vieraśnia. Ale za miesiac da hetaj daty stužku źniali z prakatu.
Choć svaje dziejańni aŭtary filma nijak nie prakamientavali, šerah amierykanskich ŚMI źviazaŭ rašeńnie z prablemnaj reputacyjaj Džoni Depa, vykanaŭcy adnoj z hałoŭnych rolaŭ u filmie.
Apošnim časam pavodziny Depa aktyŭna krytykuje presa i karystalniki sacyjalnych sietak. Siarod apošnich skandałaŭ - sudovy pazoŭ, jaki na akciora padaŭ eks-mieniedžer z łakacyj «Horada chłuśni» Hreh Bruks.
Pavodle jaho słoŭ, paśla zdymak pjany Dep źnievažaŭ jaho, a zatym dvojčy mocna ŭdaryŭ pa rebrach. Zatym akcior nibyta prapanavaŭ hrošy za toje, kab Bruks udaryŭ jaho ŭ adkaz. Pradziusar paraiŭ Bruksu padpisać pahadnieńnie ab nierazhałošvańni infarmacyi ab pavodzinach Depa. Paśla admovy, kaža Bruks, jaho adrazu zvolnili.
Adnak tolki hetym incydentam prablemnaja reputacyja Džoni Depa nie abmiažoŭvajecca. Niadaŭna časopis Rolling Stone vypuściŭ prafajł, pryśviečany akcioru. U materyjale siarod inšaha zhadvajucca surjoznyja prablemy Depa z ałkaholem i narkotykami. Raniej byłaja žonka akciora Embier Chierd vinavaciła Depa ŭ chatnim hvałcie.
Jak piša The Hollywood Reporter, hetak drennaja reputacyja Depa, jakaja ŭ apošnija miesiacy tolki pahoršyłasia, «zrobić publičnuju rekłamnuju kampaniju «Horada chłuśni» vielmi ciažkaj». Vydańnie miarkuje, što mienavita z hetym źviazana źniaćcie stužki z prakatu.
Pry hetym havorka idzie tolki pra ZŠA, u inšych krainach ni pra jakija źmianieńni ŭ datach vychadu filma nie paviedamlałasia.
Ciapier čytajuć
«Ja chaču spraviadlivaści — i dla žančyn, i dla siabie». Ščyraja hutarka z Andrejem Stryžakom pra skandał z dykpikami, zaležnaści i budučyniu36
Kamientary