Tradycyjnaje tatarskaje zastolle — biez ałkaholu. Pjuć čaj (mohuć dadavać roznyja travy). Haračy abied pačynajecca z supu, zvyčajna heta tokmač, vielmi tonkaja łokšyna ŭ kurynym bulonie. Hałoŭnaj stravaj zvyčajna vystupaje słajony piroh hubadzija ź niekalkimi vidami načynak. Usim nam viadomy bialaš taksama maje tatarskaje pachodžańnie. Ź niezvyčajnaha ŭzhadajem, što tatary ŭžyvajuć u ježu kaninu (što nie zabaroniena isłamam), dla hetaha vyroščvajuć śpiecyjalnych koniej, zvyčajna vykarystoŭvajuć maładych kabył. I adzin ź simvałaŭ tatarskaj kuchni — heta čak-čak, kavałki zdobnaha ciesta, absmažanyja na maśle i źleplenyja razam miodam. Ličycca, što hety łasunak maje pachodžańnie ažno ad vołžskich bułharaŭ.
Jak zhatavać čak-čak?
Inhredyjenty:
- 500—600 h muki
- 150 h masła
- 150 h cukru
- 5 jajek
- 300 h miodu
- 300—400 mł aleju
Rastapić na vadzianoj vańnie masła i astudzić da pakajovaj tempieratury. Da jajek dadać 30 h cukru, krychu ŭźbić, źmiašać z astudžanym masłam. Dadać, prasiejaŭšy, 500 h muki. Vymiesić ciesta i pa nieabchodnaści dadać reštu muki porcyjami, pakul ciesta nie stanie miakkim i pruhkim. Nakryć jaho i pakinuć na 15 chvilin.
Raźminać u płast ciesta naležyć rukami, ale možna i kačałkaj, da taŭščyni 1 sm. Hatovy płast narezać pałoskami šyrynioj 1—1,5 sm, a paśla kožnuju pałosku rukami skačać u žhut. Urešcie kožny žhut treba narezać na kavałački daŭžynioj 3—4 sm.
U hłybokaj patelni abo kazanie razahrejcie alej i smažcie pałački da załacistaha koleru, pamiešvajučy (pryblizna 2—3 chviliny). U toj ža čas u kastruli nahrejcie miod z reštaj cukru, na małym ahni daviadzicie da kipieńnia. Cukar musić raspuścicca, a sama karamiel stać huściejšaj.
Hatovyja pałački pakładzicie ŭ šyrokuju misu i zalicie haračym miodam. Aściarožna pieramiašajcie i vykładzicie kurhančykam.
Čak-čak jaduć rukami.
Ciapier čytajuć
Masavyja aryšty aficeraŭ prajšli na avijabazie ŭ Mačuliščach — abvinavačvajuć u suviaziach z apazicyjaj43
Kamientary