Para paśla razryvu pajšła sudzicca — nie mahli padzialić załatuju i srebnuju knopki YouTube
Cikavy kiejs trapiŭ u minski sud minułaj vosieńniu. Para, jakaja razyšłasia praź niekalki hadoŭ sumiesnaha žyćcia, nijak nie mahła padzialić załatuju i srebnuju knopki YouTube, a taksama techniku.
Hetu historyju možna znajści ŭ Banku sudovych rašeńniaŭ. Pačałasia jana ŭ žniŭni 2017 hoda. Mienavita tady maładyja ludzi (kab było zručniej, nazaviom ich umoŭna Volha i Maksim) vyrašyli žyć razam u kvatery ajčyma Maksima. U 2018 hodzie Volha stvaryła YouTube-kanał. Dziela taho, kab rabić jakasny kantent, para nabyła ŭ Jeŭropie noŭtbuk, kamieru i pryłady da jaje.
Kanał karystaŭsia papularnaściu, bo spačatku videachostynh uznaharodziŭ Volhu srebnaj knopkaj (dajecca za 100 tysiač padpisčykaŭ), a potym i załatoj (za 1 miljon padpisčykaŭ).
U listapadzie 2020 hoda para vyrašyła razyścisia, Volha navat źjechała ŭ inšy horad. Ale noŭtbuk, kamiera dy inšaje abstalavańnie, a hałoŭnaje, zasłužanyja ŭznaharody — załataja i srebnaja knopki YouTube — zastalisia ŭ kvatery ajčyma Maksima. Kab viarnuć usio heta, žančyna źviarnułasia ŭ sud. Jana śćviardžała, što ŭvieś hety čas były kachany niezakonna ŭtrymlivaje jaje majomaść. U jaho taksama zastalisia dakumienty (čeki, harantyjnyja tałony).
Kiejs razhladaŭ minułaj vosieńniu sud Centralnaha rajona Minska.
Maksim z pretenzijami nie pahadziŭsia: jon kazaŭ, što sam nabyvaŭ techniku. Mužčyna ŭdakładniŭ, što vystupaŭ u jakaści suaŭtara videa na kanale Volhi. Taksama zaviŭ, što jon źjaŭlajecca režysioram-pastanoŭščykam sprečnych videarolikaŭ i nibyta jon padbiraŭ adzieńnie dla byłoj dziaŭčyny jak viadučaj. Maksim ličyŭ, što maje takoje ž, jak i jana, prava na ŭznaharodu ad videachostynhu.
Mužčyna padkreśliŭ, što na momant pakupki techniki ŭ Volhi nie było na jaje hrošaj. I sprečny noŭtbuk jon apłaciŭ sa svajho kart-rachunku. Ale sud staŭ na bok žančyny. Pa-pieršaje, va ŭsich dakumientach na techniku było jaje imia (u pracesie razhladu spravy Volha skazała, što viarnuła Maksimu ŭsie hrošy). Pa-druhoje, mienavita jana dekłaravała ŭsio pry ŭvozie ŭ Biełaruś, a taksama atrymlivała TaxFree (sud uličyŭ, što zhodna z praviłami TaxFree vypłačvajuć tolki pakupniku). Pa-treciaje, zhodna z praviłami YouTube ŭznaharody atrymlivaje toj, na čyjo imia zarehistravany kanał.
Mužčyna paźniej skazaŭ, što noŭtbuk byccam by jahony baćka vyviez u Hiermaniju, a sumku dla kamiery i filtry sam jon pradaŭ na «Kufry».
Sud uličyŭ toj fakt, što mienavita Volhaj byli zrobleny apłaty mytnych zboraŭ za ŭvoz na terytoryju Respubliki Biełaruś srebnaj i załatoj knopki YouTube, a taksama fakt atrymańnia ich paśla mytnaha afarmleńnia. Žančyna paćvierdziła, što jana zarehistravanaja ŭ jakaści indyvidualnaha pradprymalnika i płaciła padatki ad dziejnaści, źviazanaj z vykarystańniem kanała.
Dovady ab tym, što dostup da kanała mieli aboje byłyja zakachanyja, a taksama toje, što Maksim akazaŭ Volzie dapamohu ŭ rehistracyi kanała, nie paličyli dokazam taho, što ŭładalnikam kanała źjaŭlajecca mienavita jon.
U vyniku sud pastanaviŭ: Maksim pavinien viarnuć usiu sprečnuju majomaść, a taksama dakumienty na jaje. Ź jaho spahnali apłačanuju pry padačy isku dziaržaŭnuju pošlinu ŭ pamiery 317,98 rubla, raschody pa apłacie pasłuh pierakładčyka ŭ pamiery 427 rubloŭ, a taksama raschody Volhi pa apłacie dapamohi pradstaŭnika ŭ pamiery 1 700 rubloŭ.
Maksim pasprabavaŭ abskardzić heta rašeńnie ŭ Minskim haradskim sudzie, ale ničoha nie atrymałasia. Sudovaja kalehija pakinuła rašeńnie suda Centralnaha rajona h. Minska bieź źmien. Tolki Maksimu nieabchodna było zapłacić jašče na 700 rubloŭ bolš, bo jon prajhraŭ, na jaho lehli vydatki byłoj kachanaj pa apłacie dapamohi pradstaŭnika ŭ sudzie apielacyjnaj instancyi.
U Čechii palaki źbili palaka, pryniaŭšy jaho za ŭkrainca z-za šapki ŭ kolerach Vierchniaj Silezii. Chłopiec jechaŭ u viełaprabieh dziela chvoraj na rak ciažarnaj partniorki2525
Kamientary