Nie tolki ŭ Biełarusi. U krainach ES źniščyli vakcyn suprać kavidu na čatyry miljardy jeŭra
Prynamsi 215 miljonaŭ doz vakcyn suprać kavidu, zakuplenych krainami ES u razhar pandemii, byli vykinutyja. Heta abyšłosia padatkapłacielščykam u 4 miljardy jeŭra, pakazvaje analiz Politico. Pryčym heta, vidać, zanižanaja ličba.
Z tych časoŭ, jak u kancy 2020 hoda byli ŭchvalenyja pieršyja vakcyny suprać karanavirusa, krainy ES kalektyŭna atrymali 1,5 miljarda doz (bolš za try na kožnaha žychara Jeŭropy). Mnohija ź ich ciapier lažać na śmietnikach pa ŭsim kantyniencie.
Raźliki, zasnavanyja na najaŭnych danych, pakazvajuć, što krainy ES vykinuli ŭ siarednim 0,7 injekcyj na kožnaha svajho nasielnika.
Na viaršyni škały znachodzicca Estonija, jakaja vykinuła bolš za adnu dozu na žychara, za joj idzie Niamieččyna, jakaja taksama vykinuła najbolšuju kolkaść nieapracavanych injekcyj.
Kali sprahnazavać hety siaredni ŭzrovień adkidaŭ pa astatniaj častcy ES, to jon składzie bolš jak 312 miljonaŭ źniščanych vakcyn.
Nialohka vyznačyć, kolki vakcyn było vykinuta. Urady, uklučajučy druhuju pa kolkaści nasielnictva krainu ES Francyju, nieachvotna raskryvajuć maštaby adkidaŭ.
Raźliki Politico zasnavanyja na danych z 19 jeŭrapiejskich krain — piatnaccaci, jakija dali pramyja ličby, i čatyroch, ab abjomach jakich paviedamlałasia ŭ miascovych ŚMI. Niekatoryja ličby datavanyja zusim niadaŭna, hetym miesiacam, samyja staryja adnosiacca da śniežnia 2022 hoda.
Politico aceńvaje košt 215 miljonaŭ vykinutych vakcyn bolš jak u 4 miljardy jeŭra, hruntujučysia na cenach na vakcyny, pra jakija paviedamlałasia ŭ miedyja (jany nie byli apublikavanyja).
Dla krain, jakija paviedamili tolki pra ahulnuju kolkaść źniščanych vakcyn, biez raźbiŭki pa typach, Politico vykarystała siaredniuju canu 19,39 jeŭra, raźličanuju na asnovie danych, pradastaŭlenych krainami.
Nahadajem, što niadaŭna raskazvałasia, jak u adnoj z paliklinik Homiela źniščyli amal 100 tysiač vakcyn ad kavidu.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach1
Kamientary