Łukašenka paabiacaŭ, što rasijcy vypaduć u asadak

Šmatviektarnaść aficyjnaha Minska — heta nabor zajezdžanych kružełak, pryčym procilehłaha źmiestu. Što lišni raz zaśviedčyła siońniašniaja sustreča Łukašenki ź pieršym vice-premjeram RF Šuvałavym.

Niadaŭna biełaruski pravadyr zakopvaŭ kapitalizm z antyamierykanistam Čaviesam — a praz tydzień rabiŭ revieransy pierad kapitalistami sa Štataŭ.

Tak i z Maskvoj. Na naradzie 30 sakavika Łukašenka vinavaciŭ Rasiju za kompleks starejšaha brata — praściej kažučy, niaspynnyja najezdy. A voś siońnia, 2 krasavika, zajaviŭ sanoŭnamu hościu ź biełakamiennaj, što «ŭ nas niama nijakaj kanfrantacyi». Bo — a jak ža, karonny arhumient! — «my adzin narod, a ŭ adnaho naroda nie moža być niepieraadolnych roznahałośsiaŭ».

Žadańnie ŭłahodzić rasijskaha ŭradoŭca zrazumiełaje. Maskva ŭžo vyrazna namiaknuła, što apošnija manieŭry ŭ naftavym pytańni (tankiery ź Vieniesueły, varyjant pastavak praz trubu Adesa — Brody) mohuć vyleźci bokam. Maŭlaŭ, kali vy takija pradprymalnyja — abrežam i tuju kvotu biazmytnaj nafty, što adškadavali zaraz.

U tym ža, što Minsk z Maskvoj ciapier jak kot z sabakam, haspadar sustrečy źvinavaciŭ padstupnych vorahaŭ intehracyi, zajaviŭšy, što ŭsio bolej pačynaje vieryć u isnavańnie niejkaj piataj kałony.

Zrešty, kaho-kolviek abmalavali davoli vyrazna.

«Niadaŭna ŭźniaŭsia hvałt vakoł sajtaŭ niekatorych apazicyjnych haziet, žurnalistaŭ. U najbližejšy čas paśla ekśpiertyzy my vas ź imi aznajomim, tamu što centry hetych apazicyjnych kłanaŭ znachodziacca ŭ Rasii. I ad taho, što my pakažam vam i Zachadu, abaviazkova, vy možacie naohuł vypaści ŭ asadak, nakolki škurnuju pazicyju mohuć zajmać asobnyja dziejačy», — zaintryhavaŭ haspadar hościa dy i šyrokuju publiku taksama.

Ci buduć čamadany kampramatu, babula nadvoje varažyła. Ale

toje, što niezaležnuju presu, i asabliva internet, pačynajuć dušyć pierad vybarami pa poŭnaj — vidavočna.

Vialikaje pytańnie, nakolki pavieryć Maskva viersii pra piatuju kałonu, što tarpieduje dvuchbakovyja stasunki.

Najchutčej što Šuvałaŭ zrobić zasiečku, što ŭ toj samy dzień jahony biełaruski kaleha Uładzimir Siamaška zaklikaŭ da ŭdziełu ŭ pabudovie biełaruskaj AES francuzskuju firmu «Areva»: «Dźviery adčynieny».

Dniami Łukašenka zrabiŭ anałahičnuju prapanovu amierykancam. Anhažavanyja ŭ prajekt i kitajcy, što ŭžo vyklikała žorstkuju reakcyju z vusnaŭ ambasadara Surykava: maŭlaŭ, u takija hulni Rasija hulać nie budzie.

Voś jon, sapraŭdny stan sajuznych dačynieńniaŭ: Maskva prycisnuła tak, što dyviersifikacyja — słoŭca, jakoje niadaŭna nie kožny tutejšy čynoŭnik i viedaŭ — stała łozunham vyžyvańnia.

Na praćvieražeńnie ad «bratniaj intehracyi» spatrebiłasia až 15 hadoŭ. I zaraz tutejšyja stratehi musiać dziejničać impulsiŭna, sutarhava, u režymie abvaranaj koški.

Časam heta vyhladaje zusim tannym kinom — sapraŭdy «Santa-Barbara», jak hučyć marka žadanaj nafty ad Čaviesa.

Ale ž rasijcy za «adzin narod» bolej biazmytnaj nafty ŭžo nie naljuć.

Dyj ŭvohule,

Baradzin histaryčnaj frazaj pra Daŭhalova, mahčyma, usiaho tolki pa svajoj prastacie ahučyŭ toje, što raz-poraz krucicca na jazyku ŭ partnioraŭ pa zdochłym prajekcie.

• 0
• 0
• 0
• 0
• 0
• 0
• 0
• 0