Avijakampanii-łaŭkosty chočuć prymusić admianić dapłatu za čamadan u sałonie

Jak viadoma, mnohija kampanii-łaŭkosty spahaniajuć dadatkovuju płatu za pravoz u sałonie bahažu bolšaha pamieru, naprykład, nievialikaha čamadanu na kołcach. Hetyja zbory mohuć adčuvalna pavialičyć košt pajezdki, asabliva dla tych, chto imkniecca ekanomić.

Jak piša Politico, u Ispanii vyrašyli, što z pasažyraŭ chopić — i nakłali vialiki štraf na biudžetnyja avijakampanii za płatu za ručnuju pakłažu. Ciapier spažyvieckija arhanizacyi z 12 jeŭrapiejskich krain dałučylisia da sudovaj baraćby Ispanii suprać biudžetnych avijakampanij. I jana pahražaje stać jurydyčnaj spravaj hoda.

U listapadzie 2024 hoda Ministerstva pa spravach spažyŭcoŭ Ispanii aštrafavała piać łaŭkost-kampanij na ahulnuju sumu 179 miljonaŭ jeŭra. Padstavaj stali, siarod inšaha, nieprazrystyja i niespraviadlivyja zbory za zvyčajnuju ručnuju pakłažu, jakuju pasažyr biare z saboj u sałon.

Kiraŭnik Ryanair Majkł O'Liry nazvaŭ ispanskaha ministra Pabła Bustynduja «varjackim ispanskim kamunistyčnym ministram» i navat pakazaŭ jaho kardonnuju fihuru ŭ vyhladzie kłoŭna z nadpisam «Ja pavyšaju ceny». O'Liry śćviardžaje: kali zabaranić źbirać płatu za ručnuju pakłažu, avijakampanijam daviadziecca pavysić ceny na avijabilety.

Ministr Pabła Bustynduj zajaviŭ: «Kali vaša biznes-madel pabudavana na niezakonnaj praktycy, to prablema ŭ vašaj biznes-madeli».

Jon adznačyŭ, što avijakampanii nie niasuć dadatkovych vydatkaŭ za pravoz takoj pakłažy, nie niasuć adkaznaści za jaje, u adroźnieńnie ad zarehistravanaha bahažu. Ministr źviarnuŭ uvahu, što da 2021—2022 hoda hetyja samyja kampanii nie patrabavali takoj płaty, ale ŭžo tady byli prybytkovymi.

Pavodle apošniaj spravazdačy, Ryanair zarabiła 4,7 miljarda jeŭra na «dadatkovych pasłuhach» — zbory za ručnuju pakłažu, vybar miesca, pryjarytetnuju pasadku i inšaje — heta amal treciaja častka ŭsich dachodaŭ kampanii.

Sprečka pra «ručnuju pakłažu razumnaha pamieru»

Adstojvajučy svaju pazicyju Bustynduj spasyłajecca na rašeńnie Suda Jeŭrapiejskaha Sajuza ad 2014 hoda, u jakim havorycca, što za pravoz ručnoj pakłažy nie moža spahaniacca dadatkovaja płata «pry ŭmovie, što takaja ručnaja pakłaža adpaviadaje razumnym patrabavańniam adnosna vahi i pamieraŭ, a taksama adpaviadaje dziejučym patrabavańniam biaśpieki».

Z taho času dyskusija zasiarodziłasia na tym, što źjaŭlajecca razumnym, a što nie z punktu hledžańnia pamieru i vahi čamadana.

Avijakampanii śćviardžajuć, što ŭžo dazvalajuć biaspłatna pravozić adnu nievialikuju sumku, naprykład, zaplečnik, što źmiaščajecca pad siadzieńniem, a płata spahaniajecca za bujniejšyja rečy.

Adnak abaroncy pravoŭ spažyŭcoŭ ličać, što ispanski štraf demanstruje ich racyju. U kancy maja 2025 hoda spažyvieckija arhanizacyi z 12 krain ES (u tym liku z Francyi, Italii, Bielhii, Hiermanii), pry kaardynacyi Jeŭrapiejskaj arhanizacyi spažyŭcoŭ padali skarhu ŭ Jeŭrakamisiju. Jany patrabujuć pačać ahulnaje rasśledavańnie ŭ dačynieńni da Ryanair, EasyJet, Wizz Air, Transavia, Volotea, Vueling i Norwegian Airlines.

Što budzie dalej?

Skarha supała z abmierkavańniem u ES reformy pravoŭ avijapasažyraŭ. Niekatoryja krainy chacieli b zrabić vyklučeńni dla biudžetnych avijakampanij, što vyklikaje vialiki niepakoj u spažyvieckich arhanizacyj.

Ministr Bustynduj pieraścierahaje: «Vidavočna, što avijakampanii zaraz aktyŭna łabirujuć usimi siłami źmianieńnie zakanadaŭstva ES i lehalizacyju, naprykład, hetych zboraŭ za ručnuju pakłažu. Heta nieprymalna — ES nie pavinien admaŭlacca ad svajoj misii abaraniać pravy spažyŭcoŭ».

Jeŭrakamisar pa transparcie Apostałas Cicikostas prapanavaŭ «dobraachvotnuju damoŭlenaść» pamiž avijakampanijami, kab vyznačyć ahulnyja praviły. Ale kankretnych miechanizmaŭ pakul niama.

Avijakampanii abskardžvajuć štrafy Ispanii, ale heta sprava moža pieraraści ŭ novy standart dla ŭsiaho ES.

• 5
• 0
• 1
• 1
• 0
• 0
• 0
• 0