«Hučnaja noč u Kijevie, tata!» — dačka hienierała Kiełaha stała hierojem sacsietak
Byłaja desantnica Miehan Mobs havoryć niazručnuju dla administracyi Donalda Trampa praŭdu.
6 červienia 2025 hoda Miehan Mobs, dačka śpiecyjalnaha pasłańnika prezidenta ZŠA Donalda Trampa pa Ukrainie i Rasii Kita Kiełaha, na svajoj staroncy ŭ Ch pakinuła niekalki kamientaroŭ pra načnyja padziei ŭ Kijevie. U svaim paście ŭ 3:19 pa kijeŭskim časie jana źviarnułasia da svajho baćki:
«Hučnaja noč u Kijevie, tata! Moža być, heta prosta vybuchi i stralanina ŭnačy, ale ŭ mianie takoje dziŭnaje pačućcio, što rasijanie nie žadajuć miru».
Post byŭ apublikavany na fonie paviedamleńniaŭ pra masiravanuju rasijskuju ataku pa ŭkrainskich haradach u adkaz na apieracyju «Pavucińnie», jakaja naniesła ŭdary pa rasijskich vajskovych abjektach.
Raniej, u 2:43 Miehan napisała: «Mnohija ŭkrainskija harady pad abstrełam. Rasija choča, kab vy dumali, što jana bje ŭ adkaz. Ale ŭkrainskija vysokadakładnyja ŭdary adbylisia ŭ adkaz na bieśpierapynnyja rasijskija ataki pa mirnych hramadzianach, i tolki paśla taho, jak Pucin admoviŭsia ad spynieńnia ahniu. Jamu treba praciah vajny i ŭsia Ukraina».
.@generalkellogg - loud night in Kyiv, Dad!
It might be the explosions and gunfire in the dead of night, but I get the strange feeling the Russians don't want peace. https://t.co/t42qqovv6b
Jaje słovy adlustroŭvajuć nie tolki asabistyja pieražyvańni, ale i jaje pazicyju, jakaja kantrastuje z dvuchsensoŭnaj pazicyjaj administracyi Trampa.
Hazieta The Washington Post u studzieni hetaha hoda adznačała:
«va ŭkraincaŭ niama lepšaha siabra, čym Mobs. (…) Jana znachodzicca na nie zusim zvykłym skryžavańni pratrampaŭskaj i praŭkrainskaj Amieryki».
Raskazvajem, što viadoma pra hetuju žančynu.
Viest-Pojnt i słužba ŭ Afhanistanie
Miehan naradziłasia ŭ 1987 hodzie ŭ siamji Kita Kiełaha, hienierał-lejtenanta armii ZŠA, jaki paśla staŭ klučavoj fihuraj u administracyi Donalda Trampa.
Paśla zakančeńnia škoły dziaŭčyna pastupiła ŭ Vajskovuju akademiju ZŠA ŭ Viest-Pojncie, adnu z samych prestyžnych akademij u śviecie, i skončyła jaje z adznakaj. Paśla vypusku ŭ 2008-m Miehan nakiravali słužyć u 82-ju pavietrana-desantnuju dyviziju, adnu z samych mabilnych i stratehična važnych u armii ZŠA, jakaja śpiecyjalizujecca na apieracyjach u kryzisnych zonach pa ŭsim śviecie.
U dyvizii Miehan była pryznačanaja kamandziram najbujniejšaha na toj momant uzvoda ŭ armii ZŠA, jaki składaŭsia z bolš za 130 parašutystaŭ. Jon adkazvaŭ za padrychtoŭku i pakavańnie parašutaŭ dla desantnych apieracyj, a taksama za zabieśpiačeńnie dakładnaj i biaśpiečnaj dastaŭki hruzaŭ u zonu bajavych dziejańniaŭ.
Adnoj z samych značnych u karjery Miehan stała kamandavańnie atradam pavietranaj dastaŭki, jaki byŭ nakiravany ŭ Afhanistan. Tam jana kaardynavała dastaŭku bolš za miljon funtaŭ hruzaŭ (prykładna 453,6 ton) na pieradavyja apieracyjnyja bazy pa ŭsioj krainie.
Hramadskaja i humanitarnaja dziejnaść
Paśla zaviaršeńnia słužby ŭ vojsku Miehan praciahnuła raźvivać svaje navyki ŭ akademičnaj i hramadskaj śfierach. Jana atrymała stupień mahistra ŭ halinie sudovaj psichałohii va Univiersitecie Džordža Vašynhtona, a zatym doktarskuju stupień pa kliničnaj psichałohii ŭ Kałumbijskim univiersitecie — adnym ź viadučych univiersitetaŭ ZŠA.
Jaje daśledavańni ŭ halinie psichałohii byli skancentravanyja na traŭmach, źviazanych z udziełami ŭ vojnach, i na tym, jak stres upłyvaje na pryniaćcie rašeńniaŭ u ekstremalnych umovach. Hety akademičny dośvied dapamoh joj lepš razumieć psichałahičnyja aśpiekty vajny, što stała važnaj častkaj jaje pracy ź vieteranami i achviarami kanfliktaŭ.
Miehan aktyŭna zajmajecca hramadskaj i humanitarnaj dziejnaściu. Niejki čas žančyna zajmała pasadu prezidenta rady naviedvalnikaŭ Vajskovaj akademii Viest-Pojnta pry prezidencie ZŠA, a taksama była členam rady naviedvalnikaŭ Vajskovaha instytuta Virdžynii.
Jak dyrektar Centra amierykanskaj biaśpieki i abarony pry Independent Women's Forum (IWF), jana nieadnarazova vystupała pierad Kanhresam ZŠA, krytykujučy zamiežnuju palityku administracyi Džo Bajdena, jakaja, na jaje dumku, zrabiła niedastatkova dla dapamohi Ukrainie.
Aproč hetaha, Miehan zasnavała i ŭznačaliła R.T. Weatherman Foundation — pryvatny fond, jaki zajmajecca humanitarnymi prajektami pa ŭsim śviecie. Pad jaje kiraŭnictvam fond staŭ klučavym u akazańni dapamohi Ukrainie z pačatku poŭnamaštabnaj ahresii Rasii ŭ 2022 hodzie.
Fond arhanizavaŭ łahistyčny chab na rumynska-ŭkrainskaj miažy, praź jaki było dastaŭlena bolš za 10 000 paddonaŭ ź miedykamientami i humanitarnaj dapamohaj dla bolš jak siamidziesiaci ŭkrainskich balnic i arhanizacyj.
R.T. Weatherman Foundation taksama dapamahaje evakuiravać paranienych amierykanskich vałancioraŭ, jakija vajujuć na baku Ukrainy, u vajskovy špital ZŠA ŭ Łandštule (Hiermanija) i zajmajecca repatryjacyjaj cieł zahinułych dobraachvotnikaŭ.
Asabistaje žyćcio Miehan Mobs zastajecca mienš publičnym. Viadoma, što jana zamužam za dziejnym aficeram piachoty armii ZŠA. U ich dźvie dački.
Miehan, niahledziačy na blizkija adnosiny z baćkam, nie zaŭsiody padzialaje jahonyja pohlady. U intervju Kyiv Post ad 28 lutaha 2025 hoda jana adznačyła:
«Ja nie zaŭsiody zhodnaja ź im, i jon nie zaŭsiody zhodny sa mnoj. Ja 38-hadovaja žančyna, u mianie jość svaje ŭłasnyja pohlady». Ich jana pastajanna vykazvaje ŭ tym liku i praz svaje staronki ŭ Ch i instahram.
Apytanka
Učora Minsk znoŭ zatapiła. Čamu stalica nie hatovaja da daždžoŭ?4
Kamientary