Michaił Huceryjeŭ źbirajecca pryjści ŭ biełaruskuju sielskuju haspadarku
Staršynia Homielskaha abłvykankama Ivan Krupko sustreŭsia ź viadomym rasijskim biznesmienam Michaił Huceryjevym. Padčas sustrečy abmiarkoŭvałasia «pytańnie vydzialeńnia sielskahaspadarčych ziamiel dla raźvićcia ahrarnaha biznesu», paviedamlaje pres-słužba Homielskaha abłvykankama.
Akramia taho, Krupko i Huceryjeŭ «havaryli pra ŭkładańnie inviestycyj u ahrapramysłovy kompleks i raźvićcio fiermierskich haspadarak». Inšych padrabiaznaściaŭ hetaj sustrečy pakul nie pryvodzicca.
68‑hadovy Michaił Huceryjeŭ — bujny rasijski pradprymalnik inhušskaha pachodžańnia, asnoŭny ŭładalnik pramysłova-finansavaj hrupy «Safmar». Jon uvachodzić u lik najbahaciejšych ludziej Rasii, pabudavaŭšy svaju impieryju na nafcie, vuhali, nieruchomaści i rytejle.
Doŭhi čas jaho hałoŭnym aktyvam była naftavaja kampanija «Rusnafta», jakuju jon zasnavaŭ paśla pracy ŭ dziaržaŭnaj «Słaŭnafcie».
Dla Biełarusi jaho postać značnaja praz ščylnyja suviazi z režymam Łukašenki i realizacyju maštabnych inviestycyjnych prajektaŭ. Mienavita jaho kampanija «Słaŭkalij» zajmałasia budaŭnictvam Niežynskaha horna-ŭzbahačalnaha kambinata ŭ Lubanskim rajonie, choć urešcie ad hetaha aktyvu jon musiŭ admovicca. Huceryjeŭ taksama inviestavaŭ u budaŭnictva hatelaŭ, terminała ŭ aeraporcie i inšych abjektaŭ nieruchomaści ŭ Minsku.
Z-za padtrymki biełaruskaha režymu pradprymalnik paśla padziej 2020 hoda trapiŭ pad sankcyi Jeŭrasajuza i Vialikabrytanii. U vyniku sankcyjnaha cisku jon byŭ vymušany farmalna pieradać častku svaich aktyvaŭ členam siamji abo partnioram.
Akramia biznesu, Huceryjeŭ viadomy jak aktyŭny paet-piesieńnik, jaki piša teksty dla mnohich zorak rasijskaj estrady.
Chto taki Michaił Huceryjeŭ i čym jamu adhuknucca brytanskija sankcyi?
«Jany ŭsie chočuć Saviecki Sajuz, ale pry hetym žyć jak siońnia». Siabar Łukašenki rezka raskrytykavaŭ savieckaje minułaje i jaho restaŭrataraŭ
Aliharch Huceryjeŭ raskazaŭ, jak rasčaravaŭsia ŭ Zachadzie: Paśla 2022 hoda ja nibyta źniaŭ šory ź siabie
Michaił Huceryjeŭ paćvierdziŭ nacyjanalizacyju «Słaŭkalija» i skazaŭ pra «zavisańnie» svaich paŭmiljarda dalaraŭ
Ciapier čytajuć
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary