Andrejeva: Kaleśnikavu kupili za «Biełaruśkalij», mianie za źniaćcio sankcyj z bankaŭ. Kali b sankcyj nie było, za što b nas kuplali?
U svaim pieršym vialikim interju paśla vyzvaleńnia žurnalistka «Biełsata» Kaciaryna Andrejeva vykazała svajo mierkavańnie adnosna «dyjałohu» z Łukašenkam, za jaki vystupaje Maryja Kaleśnikava.
Byłaja palitźniavolenaja Kaciaryna Andrejeva ŭ prahramie «Mnie tolki spytać» adznačyła, što dyjałoh z aficyjnym Minskam — heta nie novaja źjava, prynamsi dla Złučanych Štataŭ.
«Dyjałoh jość u amierykancaŭ u lubym razie, bo kali jany prylatajuć u Minsk, jany siadajuć za stoł pieramoŭ. I nasuprać ich siadzić staršynia KDB. I Łukašenka siadzić ź imi ŭsimi za adnym stałom», — padkreśliła jana.
Kamientujučy pazicyju Maryi Kaleśnikavaj, jakaja zaklikaje Jeŭropu pajści na padobny krok, Andrejeva zadajecca pytańniem pra metu i srodki takoha ŭzajemadziejańnia.
Žurnalistka pierakananaja: adzinaje, što prymušaje ŭłady iści na sastupki i vyzvalać palitviaźniaŭ — heta ekanamičnyja straty ad sankcyj. Jana adkryta nazyvaje praces vyzvaleńnia «kuplaj».
«Nam treba ŭsim razumieć, vielmi dobra i jasna ŭśviedamlać, što kali b nie było sankcyj, nie było b čym tarhavacca. Nu voś, Mašu kupili za «Biełaruśkalij». Voś mianie kupili za kalij, źniaćcie sankcyj z bankaŭ, i niejkija jašče, mahčyma, damoŭlenaści, jakija prosta nie vynosili amierykancy ŭ publičny trek», —
zaŭvažaje Andrejeva i davodzić, što spadziavacca na maralnyja jakaści pradstaŭnikoŭ režymu paśla hadoŭ žorstkaści biessensoŭna:
«Kali b hetaha nie było, a za što b nas kuplali? Raźličvać na žest dobraj voli? Na humanizm? Čałaviečnaść? Na što možna raźličvać paśla piaci hadoŭ prosta tatalnych, tatalnych represij?»
U takich umovach, na dumku Andrejevaj, toj prahmatyčny padychod, što demanstruje Donald Tramp, — adzinaja mahčymaść «padabracca da Łukašenki, pasadzić jaho za stoł» i prapanavać ździełku, uličvajučy, što ekanomika Biełarusi mocna paciarpieła ad sankcyj.
«Ja baču, što jany sapraŭdy paciarpieli ad sankcyj, jakija byli ŭviedzienyja praź ichnija ž učynki: praz zatrymańnie ludziej, praz toje, što Biełaruś stała płacdarmam dla ŭviadzieńnia rasijskich vojskaŭ u 22‑m hodzie, praz saŭdzieł u hetaj ahresii. Niemahčyma było b za štości inšaje tarhavacca. Jakija jana [Amieryka] opcyi moža prapanavać? Prosta sieści za stoł? Biez papiarednich umoŭ?» — ličyć byłaja palitźniavolenaja.
Pra što maŭčyć Alaksiej Franckievič, jakomu Polšča zakryła ŭjezd na 10 hadoŭ55
Kamientary
A za odnu Andriejevu voobŝie ničieho by nie priedłožili, nie tot kalibr, čto u Koleśnikovoj