Dzień salidarnaści 16-ha
Vialejski sud 13 lutaha daŭ Mikołu Susłu i Ŭładzimieru Malarčuku 145 tys. rub. štrafu za raspaŭsiud ulotak da Dnia salidarnaści.
13 lutaha ŭ Miencku padčas rasklejki ŭlotak milicyja zatrymała Aleha Dziemčanku, Alaksandra Paźniaka, Ksieniju Pałaš, Alaksandru Śvitko. Na ich skłali pratakoły. U centry Miensku byli zatrymanyja 22 moładzievyja aktyvisty: Jaŭhien Afnahiel, Pavał Juchnievič, Nika Łazoŭskaja, Natalla Vuško, Darja Małdavanava, Luboŭ Kučynskaja, Ł.Piacevič, Kaciaryna Dziadkoŭskaja, A.Kołčyk, Jaŭhienija Karona, Michaił Hierasimovič, Alaksandar Čarnyšoŭ, Andrej Barkoŭski, Kaciaryna Aładka, Kanstancin Martynovič, Mikita Šuciankoŭ, Nastaśsia Šaškova, Alesia Kavaleŭskaja, Źmicier Jurkoŭ, Uładzimier Parchomienka, Maks Susied, Andrej Kuźmicki. A 23-j usich adpuścili. 14 lutaha sud Partyzanskaha rajonu Miensku daŭ Ja.Afnahielu 15 sutak.
Podpisy katu pad chvost
Podpisy za vyłučeńnie A.Milinkieviča, sabranyja ŭ 10 rajonach Haradzienščyny (Astraviecki, Ašmianski, Vaŭkavyski, Haradzienski, Zelvienski, Ivieŭski, Mastoŭski, Navahradzki, Słonimski, Ščučynski), pryznanyja niesapraŭdnymi.
Štraf za kalandaryki
Moładzievaha aktyvista z Mastoŭ Jaŭhiena Skrabutana aštrafavali na 10 b.v. (290 tys. rub.) za raspaŭsiud kalandarykaŭ z partretam Milinkieviča.
Pamarozili čarnobylca
U vioscy Sirod (Kalinkavicki rajon) 8 lutaha milicyjanty ŭžyli siłu suprać čarnobylskaha likvidatara, invalida II hrupy Vasila Siliviersta. U Domie kultury jon patrabavaŭ prybrać ahitacyjny stend ź bijahrafijaj Łukašenki. Kali supracoŭnica DK admoviłasia, V.Silivierst sam źniaŭ bijahrafiju. Vyklikanaja z rajcentru aperhrupa pavaliła čałavieka na śnieh tvaram dołu i hadzinu trymała na marozie, šukajučy arkuš ź bijahrafijaj. Z rajadździełu milicyi sp.Siliviersta dastavili ŭ bolnicu. Daktary kanstatavali abmaražeńnie žyvata.
Pravakacyja suprać Novikavaj
Na miančanku Aksanu Novikavu prakuratura Kojdanava «aktyvizavała» kryminalnuju spravu za machlarstva. U 2005 h. supracoŭniki pašpartnaha adździełu horadu vyjavili, što niejkaja žančyna atrymała falšyvy pašpart z fatazdymkam A.Novikavaj. Sama spn. Novikava tłumačyć aktyvizacyju spravy tym, što sprabavała pryciahnuć viadučaha teleprahramy «Palittechnalohii» Jaŭhiena Novikava da adkaznaści za prapahandu vajny.
Dumali, špijony
11 lutaha ŭ Horadni milicyjanty zatrymali mikraaŭtobus z 5 hramadzianami Švecyi (studenty, siabry moładzievaj frakcyi Partyi maderataŭ), a taksama pradstaŭnikami Moładzi BNF: Frankam Viačorkam, Kaciarynaj Markoŭskaj, Alesiem Kalitom, Ściapanam Śvidzierskim i kiroŭcam transpartu Michasiom Vasileŭskim. Hrupa jechała na ekskursiju, milicyjanty šukali niezarehistravanyja materyjały.
U pamiaškańni, što naležyć kiraŭniku bieraściejskaha štabu A.Milinkieviča, aktyvistu AHP Uładzimieru Radzivončyku, 11 lutaha adbyŭsia pieratrus. Milicyjanty spasłalisia na telefanavańnie, što ŭ sutareńniach domu zachoŭvajucca bojeprypasy. Snaradaŭ nie znajšli, kanfiskavali dakumentacyju AHP, kalendary j plakaty z adzinym.
Za presaj cikujuć
Pasolstva Biełarusi 6 lutaha admoviła ŭ vizie žurnalistu najbujniejšaj słavackaj hazety «Sme» Mirku Todu. Toda mieŭsia aśviatlać prezydenckija vybary.
Redaktara «Baranavickaj hazety», invalida II hrupy Ŭładzimiera Hundara aštrafavali 6 lutaha na 20 b.v. Jaho pryznali ŭdzielnikam śniežańskaj niesankcyjavanaj akcyi salidarnaści z presaj. Padstavaj dla spravy staŭ fatazdymak z akcyi, nadrukavany ŭ hazecie «Intex-press».
Mikołu Markieviča 10 lutaha pilna praviarali na biełaruska-polskaj miažy. Paśla mytnaha nadhladu jaho viarnuli na pašpartny kantrol i paŭtorny vobšuk.
U Žabincy (Bieraściejščyna) 11 lutaha milicyjanty zatrymali hramadzkaha aktyvista Vasila Andrasiuka. Pry nadhladzie ŭ jaho sumcy znajšli biuleteń «Prava na volu» i skłali pratakoł za raspaŭsiud drukavanych materyjałaŭ biez vychodnych źviestak.
U Barysavie
Za rasklejku nalepak «My chočam novaha!» 7 lutaha ŭ Barysavie zatrymanyja junyja aktyvisty Jury Kraŭčanka i Maćviej Bialaj. 9 lutaha padčas rasklejki nalepak zatrymanyja Pavał Minald, Anatol Alaksandraŭ, Andrej Chackievič, Alaksandar Čarnucha.
Moładź Miensku
6 lutaha niepaŭnaletniaha aktyvista Alaksieja Čunina zatrymali padčas rasklejki nalepak u Miensku. Na jaho baćkoŭ skłali pratakoł za «ŭchileńnie ad baćkoŭskich abaviazkaŭ».
U Miensku ŭ metro 8 lutaha zatrymany moładzievy aktyvist Aleh Miacielica: milicyjanty zajavili, što jon «padobny da čałavieka, jaki ŭčyniŭ pravaparušeńnie». U pastarunku ŭ jaho źniali adbitki palcaŭ i skłali pratakoł za «antysanitaryju».
Studentu III kursu Mienskaha politechničnaha kaledžu Alaksandru Kurbackamu 7 lutaha kiraŭnictva ŭstanovy pahražała adličeńniem za propusk zaniatkaŭ 1—4 vieraśnia 2005 h. Jon adbyvaŭ 10 sutak za ŭdzieł u akcyi padtrymki zatrymanych u Miensku aktyvistaŭ hruzinskaj arhanizacyi «Kmara».
U Salihorsku
U Salihorsku milicyja ŭzmacniła cisk na moładzievych aktyvistaŭ. U horadzie źjaviłasia kala 200 nadpisaŭ «Dastaŭ!», što stała padstavaj dla aktyvizacyi pravaachoŭnych orhanaŭ. Niepaŭnaletniaha Jaŭhiena Miadźviedzieva 7 lutaha zabrali z domu razam z baćkam u pastarunak. Niekalki hadzinaŭ jaho raspytvali nakont nadpisaŭ. U toj samy dzień milicyjanty naviedali adnu ź siarednich škołaŭ Salihorsku. U kabinet dyrektara jany vyklikali pa adnym Jaŭhiena Škrabu, Ryhora Astapieniu, Jaŭhiena Pušču, Vitala Bandarčuka, Vitala Bondara, Ivana Šyłu.
8 lutaha milicyjanty zatrymali niepaŭnaletnich Ivana Šyłu, Uładzimiera Lepieša, Kryścinu Samojłavu i Hleba Sandersa: ich źvinavacili ŭ «naviazvańni stužak z džynsavaj tkaniny».
11 lutaha paśla sustrečy ź miascovymi aktyvistami zatrymany kiraŭnik AHP i staršynia Nacyjanalnaha kamitetu abjadnanaj apazycyi Anatol Labiedźka. Razam ź im zatrymali ŭdzielnikaŭ sustrečy Alaksieja Vałabujeva j Kiryłu Chramcova.
12 lutaha ŭ Salihorsku milicyjanty zatrymali moładzievaha aktyvista Dzianisa Karnova, jaki viarnuŭsia z Ukrainy. U pastarunku praviali asabisty nadhlad chłopca i skłali pratakoł pra kanfiskacyju asabistych papieraŭ.
Cisnuć na Batujeva
Studenta-zavočnika BATU, aktyvista Partyi BNF Paŭła Batujeva 10 lutaha vyklikali ŭ dekanat. Administracyja fakultetu, spasyłajučysia na rasparadžeńnie Minadukacyi, pahražała Paŭłu adličeńniem u suviazi z tym, što jon fihuruje ŭ kryminalnaj «spravie Kaśpiaroviča».
Miesca dla štampa
Biełaruskija pamiežniki 7 lutaha zabaranili vyjezd u Polšču Anžalicy Borys, spasłaŭšysia na toje, što ŭ jaje pašparcie niama volnaha miesca na štamp. Na nastupny dzień jana prajechała ŭ Polšču praz Rasieju i Ŭkrainu, i tam pamiežniki miesca dla štampa znajšli biez prablemaŭ.
Pieršy staršynia Sajuzu palakaŭ Biełarusi Tadevuš Havin maje padać u sud na BT za film «Ahient 590» pra dziejnaść polskaj vyviedki ŭ Biełarusi. Pra Havina havaryłasia, što zamiežnyja dyplamaty aktyŭna zadziejničali jaho ŭ antybiełaruskaj kampanii.
Štrafy padprymalnikam
Uładzimier Levanieŭski, syn palitviaźnia Valerja Levanieŭskaha, atrymaŭ 9 lutaha pastanovu administracyjnaj kamisii Leninskaha rajonu Horadni. Jamu dali štraf u 87 tys. rub. za raspaŭsiud 22 śniežnia biuletenia «Priedprinimatiel», vydadzienaha biez vychodnych źviestak. Kamisija taksama paličyła, što źmiest biuleteniu nakiravany na «ŭčynieńnie škody dziaržaŭnamu i hramadzkamu paradku».
10 lutaha ŭ Miensku zatrymany staršynia kaardynacyjnaj rady indyvidualnych pradprymalnikaŭ Miensku Alaksandar Makajeŭ. Z Červieńskaha rynku jaho advieźli ŭ sud i vynieśli aficyjnaje papiaredžańnie za namier pravieści niesankcyjavanuju akcyju — usiebiełaruski strajk pradprymalnikaŭ 2—3 sakavika. Nazaŭtra paśla pratestu prakurora, Makajevu dali 10 sutak aryštu.
U Połacku
Moładzievuju aktyvistku, vučanicu škoły №9 h.Połacku M.Dziemiančonak 27, 30, 31 studzienia vyklikali na razmovu pradstaŭniki školnaj administracyi j patrabavali raspavieści pra ŭdzieł u vybarčaj kampanii, a taksama pra dziejnaść jejnych svajakoŭ — aktyvistaŭ demakratyčnaha ruchu.
A 2.30 nočy 13 lutaha ŭ Navapołacku milicyjanty zatrymali aktyvista Partyi BNF Alaksieja Trubkina: jon prymacavaŭ da vuličnaj doški abviestak nalepku «My chočam novaha!». U pastarunku skłali administracyjny pratakoł za raspaŭsiud drukavanaj pradukcyi biez vychodnych źviestak.
U Śvietłahorsku
Prakuratura Śvietłahorskaha rajonu (Homielskaja vobłaść) 9 lutaha raspačała dyscyplinarnuju spravu suprać učastkovaha inspektara miascovaha RUUS D.Rahaleviča. Prakurorskaja pravierka tyčyłasia pieratrusu kvatery śvietłahorskaha demakratyčnaha aktyvista Telmana Maślukova ŭ śniežni. Na imia Rahaleviča była vypisana sankcyja na pieratrus, ale, pa słovach Maślukova, kiravaŭ pieratrusam namieśnik načalnika Śvietłahorskaha RUUS major P.Zykun.
Maślukova padazravali «ŭ zachoŭvańni zbroi j narkotykaŭ», ale padčas pieratrusu zamiest zbroi skanfiskavali kseraks, knihi «Łukašenka. Palityčnaja bijahrafija», «Biełaruś: Scenary reformaŭ», hazetu «Rehijanalnyja naviny». Prakuror rajonu, daradca justycyi M.Prus, vyrašyŭ, što pry hetym byŭ parušany Kryminalna-pracesualny kodeks.
Pieratrus u Mahilovie
U Mahilovie ŭnačy na 12 lutaha adbyŭsia pieratrus u domie aktyvista Partyi BNF Sieržuka Niahacina.
U Homieli
10 lutaha ŭ Homieli zatrymany deputat haradzkoj rady, aktyvist demakratyčnaha ruchu Jury Hłušakoŭ. U jaho skanfiskavali 11 000 ulotak z karykaturami na prahramy BT.
Pieraśled za vieru
Z pastara likvidavanaj u žniŭni 2005 h. Biełaruskaj pratestanckaj carkvy Ernsta Sabiły sudovyja vykanaŭcy spahaniajuć sudovy padatak — 127,5 tys.rub. Praces pa likvidacyi praz adsutnaść jurydyčnaha adrasu inicyjavaŭ Mienharvykankam, ale sudovyja vydatki spahaniajuć z pastara. U vypadku niavypłaty jamu pahražajuć vyličyć hrošy ź jahonaj pensii i pierapisać majomaść (pracedura budzie kaštavać Sabiłu jašče 10 b.v.). Sabiła, jaki za vieru adsiedzieŭ 25 hadoŭ u savieckim kanclahiery, płacić rašuča admaŭlajecca.
Kamientary